კონგრესმენმა ტედ პომ და კონგრესმენმა ჯინ გრინმა 23 ოქტომბერს ორპარტიული რეზოლუცია წარადგინეს, რეზოლუცია, რომელიც კვლავ გამოხატავს ამერიკის შეერთებული შტატების მხარდაჭერას საქართველოს სახელმწიფოს მიმართ, ხაზს უსვამს და მიუთითებს ქვეყანაში, სახელისუფლო დონეზე კორუფციისა და ბიუროკრატიული არეულობის არსებობაზე.

„ნიუპოსტთან“ საუბრისას საქართველოს თავდაცვის ყოფილი მინისტრი, დიმიტრი შაშკინი აცხადებს, რომ რეზოლუცია არის ყველაზე მკაცრი ენით დაწერილი, რაც არის დიპლომატიურ წრეებში მიღებული, საქართველოს მთავრობა თუ ამ ენას ვერ გაიგებს, ქვეყანას ეს ძვირად დაუჯდება:

„ამ ორ კონგრესმენს სამწუხაროდ ახალი არაფერი უთქვამს, ხაზი უნდა გაესვას იმას, რომ ერთი არის რესპუბლიკელი და მეორე დემოკრატი, როდესაც კეთდება განცხადება ორივე პარტიის სახელით და კონგრესის სახელით, ეს ითვლება კონსესუსად კონგრესში. არც თუ ისე ხშირად არიან რესპუბლიკელები და დემოკრატები ერთ პოზიციაზე, მაგრამ ამ სიტუაციაში, ჩვენდა სამწუხაროდ, თანხმდებიან.

თქვეს ის, რაც ჩვენც ვიცით, რომ ყვავის ჩვენს ქვეყანაში კორუფცია და ბიუროკრატია, ეს აღაშფოთებს უკვე არა მხოლოდ საქართველოს მოსახლეობას, არამედ ჩვენს პარტნიორებსაც, ეს პრობლემები უკვე შეეხო ამერიკულ კომპანიებსაც. ეს რეზოლუცია ნიშნავს იმას, რომ ნაკლები ინვესტიცია შემოვა, ნაკლები სამუშაო ადგილი იქნება, ნაკლები ფული შემოვა ჩვენს ქვეყანაში და ეს ყველაფერი ჩვენს ჯიბეზე აისახება.

ხელისუფლების კორუფციული და ბიუროკრატიული მადა იმდენად გაიზარდა, რომ თავს უფლებას აძლევს, გაამწაროს არა მარტო ქართული, არამედ უცხოური კომპანიებიც, მათ ჰგონიათ, რომ რაც გასდით საქართველოში, გაუვათ ამერიკაშიც. ეს რეზოლუცია იმის ნიშნანია, რომ რასაც ატყუებენ საქართველოს მოსახლეობას, ამერიკაში არ გაუვათ.

ეს არის ყველაზე მკაცრი ენით დაწერილი რეზოლუცია, რომელიც დიპლომატიურ წრეებში არის მიღებული. მე ვფიქრობ, რომ ეს მთავრობა ვერც გაიგებს რა წერია აქ, ეს კი ძვირად დაუჯდება ქვეყანას. ნურავის გაუკვირდება რატომ დავარდა ლარის კურსი, პოლიტიკა და ეკონომიკა ერთმანეთზე არის გადაჯაჭვული. ამაზე უფრო დიდი განგაშის ზარი რა უნდა იყოს?“, - განაცხადა დიმიტრი შაშკინმა.