ამომრჩეველთა სამაგიდო სიების გაცემის მოთხოვნა

ამომრჩეველთა სამაგიდო სიების გაცემის მოთხოვნა - ცესკო ოპოზიციას პასუხობს

პოლიტიკა - 15:31, 27 Oct, 2017

1046

ცენტრალური საარჩევნო კომისია, "ნაციონალური მოძრაობის" მოთხოვნას კანონთან შეუსაბამოს უწოდებს. საუბარია ამომრჩეველთა სამაგიდო სიების გაცემაზე.
უწყებაში განმარტავენ, რომ სამაგიდო სიები დალუქულია, მასში არსებული ინფორმაციის დამუშავება და გაცემა წარმოადგენს კომისიისთვის განსაზღვრულ უფლებას.

რაც შეეხება ცაგერის 21-ე საარჩევნო უბანთან დაკავშირებით „ენმ“-ის მიერ გავრცელებულ ინფორმაციას, ცესკოში აცხადებენ, რომ აღნიშნული სიმართლეს არ შეესაბამება და კომისიის 13 წევრიდან არცერთს არ დაუწერია საჩივარი.

"საქართველოს კანონმდებლობის თანახმად, არ არსებობს ამომრჩეველთა სამაგიდო სიის საჯარო ვერსია და ის არ გაიცემა საჯარო წესით. სამაგიდო სიებში ამომრჩეველთა რეგისტრაციის და იდენტიფიკაციის პროცესი ხელმისაწვდომია არჩევნების დღეს, დაკვირვების უფლების მქონე პირებისთვის. შესაბამისად, ეს პროცესი არჩევნების დღეს ხელმისაწვდომი იყო როგორც დამკვირვებლებისთვის, ისე ნებისმიერი პოლიტიკური პარტიის/საარჩევნო სუბიექტის აკრედიტებული წარმომადგენლისთვის.

ამასთან, არჩევნების დღის შემდეგ, სამაგიდო სიები იმყოფება დალუქულ მდგომარეობაში და მასში არსებული ინფორმაციის დამუშავება და ნებისმიერი ინფორმაციის გაცემა უნდა წარმოადგენდეს მხოლოდ კომისიისთვის კანონით განსაზღვრულ უფლებამოსილებას. შესაბამისად, დღეს ნაციონალური მოძრაობის წარმომადგენლის ბრიფინგზე გაჟღერებული მოთხოვნა საერთოდ აცდენილია კანონმდებლობას, თუმცაღა წესით, აღნიშნული რეგულაციები კარგად უნდა იყოს ცნობილი პოლიტიკური მხარეებისთვის.

ამდენად, საზოგადოების საყურადღებოდ განვმარტავთ, რომ ეს მოთხოვნა აბსოლუტურად შეუსაბამოა კანონთან და კიდევ ერთხელ აღვნიშნავთ, რომ ამომრჩეველთა სამაგიდო სია საჯარო წესით არ გაიცემა.

რაც შეეხება ცაგერის # 21 საარჩევნო უბანს, ამ უბანზე არის სულ 35 ამომრჩეველი რეგისტრირებული (33 ერთიან და 2 სპეციალურ სიაში) და როგორც საუბნო შემაჯამებელი ოქმიდან ჩანს, არჩევნებში მონაწილეობა მიიღო 31-მა ამომრჩეველმა (4-ს არ მიუღია მონაწილეობა). ამ უბანზე კენჭისყრის დღეს იმყოფებოდნენ დამკვირვებლები და სუბიექტების წარმომადგენლები, უბანზე არ დაფიქსირებულა არანაირი პრეტენზია და ცაგერის მთლიან ოლქში არ შესულა არანაირი საჩივარი. უფრო მეტიც, კომისიის ყველა - 13-ვე წევრის, მათ შორის ნაციონალური მოძრაობიდან დანიშნულ და ნაციონალური მოძრაობის ბლოკში შემავალი ქრისტიან-კონსერვატიული პარტიიდან დანიშნული წევრების ხელმოწერაც ახლავს შემაჯამებელ ოქმს და არ ფიქსირდება არანაირი განსხვავებული აზრი, რაც ცხადია კომისიის ყველა წევრის მიერ ადასტურებს პროცესის კანონშესაბამისობას.

შესაბამისად, ამ უბანთან დაკავშირებული პრეტენზიები ან გაურკვეველი წარმომავლობის სატელეფონო ზარები არის მხოლოდ პოლიტიკური დღის წესრიგის ხასიათის, საზოგადოების აზრზე ზეგავლენის მიზნით და მას რეალური სამართლებრივი საფუძვლები არ გააჩნია"- აცხადებენ ცესკოში.

"ნაციონალური მოძრაობა" არჩვენების დღეს მომხდარ სავარაუდო სისხლის სამართლის დანაშაულზე საუბრობს და კონკრეტულ ფაქტებს ასახელებს. საუბარია ცაგერის საარჩევნო ოლქის 21-ე საარჩევნო უბნის მონაცემებზე, სადაც ოფიციალურად დარეგისტრირებულია 33 ამომრჩეველი და კენჭისყრაში მონაწილეობა მიიღო 31-მა.

თუმცა პარალელურად, პარტიის ლიდერების მტკიცებით, 10 ადამიანს კენჭისყრაში მონაწილეობა საერთოდ არ მიუღიათ.