„საქართველოს ახალგაზრდა იურისთაასოციაციის“ ხელმძღვანელი ანა ნაცვლიშვილი ნუცუბიძეზე გარდაცვლილი მამაკაცის შესახებ შსს-ს მიერ გავრცელებული ინფორმაციის შეფასებისას ამბობს: "ვფიქრობ, რომ მიკერძოებულია და ცალსახად იკვეთება მცდელობა, საზოგადოებრივი აზრი არასწორი მიმართულებით ჩამოყალიბდეს".

ანა ნაცვლიშვილის განმარტებით, ხაზგასმა იმაზე, რომ ადამიანი ალკოჰოლის ზემოქმედების ქვეშ იყო და გარდაიცვალა, არასწორია და მთავარი შესწავლის საგანი უნდა იყოს, ხომ არ იკვეთება არაკანონშესაბამისი ქმედებები პოლიციის მხრიდან.

„ინფორმაცია, რომელსაც შსს ავრცელებს, დაახლოებით ასეთია, რომ ერთი უბრალო ადამიანი გარდაიცვალა, რომელიც შესაძლოა, იყო ალკოჰოლის ზემოქმედების ქვეშ, ან ცხოვრების წესი ჰქონდა დაკავშირებული ალკოჰოლთან, რომ თითქოს არაფერი განსაკუთრებული არ მომხდარა, თითქოს არავინ განსაკუთრებული არ მომკვდარა. შსს-ს განცხადება ამ ტიპის მესიჯის გავრცელების მცდელობის შთაბეჭდილებას ტოვებს, მაშინ, როცა შესაძლოა, საერთოდ არ ჰქონდეს კავშირი საქმესთან იმას, თუ რა ტიპის ურთიერთობა ჰქონდა ამ ადამიანს ალკოჰოლთან. მთავარი შესწავლის საგანი უნდა იყოს ის, რომ ეს ადამიანი პოლიციის ხელში რომ გარდაიცვალა, იკვეთება თუ არა პოლიციის მხრიდან არასწორი, არაკანონშესაბამისი მოქმედება. მთავარი კითხვა, რასაც სახელმწიფომ უნდა გასცეს პასუხი არის ის, რომ პოლიციის თანამშრომლები მოქმედებდნენ თუ არა კანონის სრული დაცვით. მუხლი, რომელიც გაუფრთხილებლობით სიცოცხლის მოსპობას ეხება, შესაძლოა, არ იყოს საკმარისი იმისთვის, რომ სწორედ პოლიციელთა მოქმედებები იყოს მთავარი შესწავლის საგანი. ჩვენ გვაქვს კოდექსში მუხლები, რომელიც სამოხელეო დანაშაულს ეხება. კვალიფიკაციას დიდი მნიშვნელობა აქვს იმისთვის, რომ გამოძიების სრულყოფილება იყოს უზრუნველყოფილი“, - განაცხადა ანა ნაცვლიშვილმა.