საქართველოს პრეზიდენტი არჩევნებზე ადმინისტრაციული რესურსის გამოყენების პრობლემაზე საუბრობს. გიორგი მარგველაშვილის შეფასებით, "ადამიანის სამსახური მის პოლიტიკურ ნებაზე არ უნდა იყოს დამოკიდებული".

"თუ ამ ადამიანებს პოლიტიკურ აქცენტს დავუყენებთ - მივიდნენ თუ არა არჩევნებზე, თუ მისცეს ხმა ეს არამარტო თავისუფალი ნების გამოვლინების ხელისშეშლაა, არამედ ეს ადამიანის ღირსების შემლახავია, რასთან დაკავშირებითაც სამწუხაროდ კითხვები დაისვა. ძალიან ბევრი კითხვა დაისვა საჯარო მოსამსახურეების ნებასთან მიმართებით, თუ რამდენად იყო მათი ნება თავისუფალი და მათი უშუალო ხელმძღვანელები რამდენად აკონტროლებდნენ მათ ნებას. აქ საუბარია ადამიანებზე, რომელთათვისაც სამსახური არ უნდა იყოს პოლიტიკური არჩევანის რისკთან დაკავშირებული“, - განაცხადა გიორგი მარგველაშვილმა.

მისი თქმით, საარჩევნო პროცესში უნდა შენარჩუნდეს ასეთი ფაქტები, როცა ოპოზიციის კანდიდატი ერთი ხმით ან ათი ხმით იგებს .

"მმართველმა პარტიამ დიდი უპირატესობით მოიგო და ეს მისალოცია, მაგრამ მისალოცია თუ არა ეს დემოკრატიისთვის ამაზე შეგვიძლია ბევრი ვიმსჯელოთ იმიტომ, რომ ერთ-ერთი სერიოზული კითხვის ნიშანი, რომელიც ჩვენს დემოკრატიასთან დაკავშირებით უკვე დაისვა და დამიჯერეთ, ამ კითხვის ნიშნის სულისკვეთება გაღრმავდება, მდგომარეობს იმაში – შეიძლება კი ქვეყანაში, სადაც ყველა ძირითადი სახელისუფლებო ვერტიკალი და ბერკეტები ერთი პარტიის ხელშია, შეიძლება კი იქ კითხვა არ დავსვათ დემოკრატიის სისრულის, მთლიანობის, ეფექტური დემოკრატიის შესახებ?! უბრალოდ, ბუნებაში ასე არ არსებობს. მე სულ მახსოვს „ნაციონალური მოძრაობის“ დროსაც, მანამდეც, მმართველი პარტიის პათეტიკა, რომ ჩვენ აქ გავერთიანდით ყველაზე ჭკვიანები, ყველაზე შორსმჭვრეტელები, ყველაზე სინდისიერები, დანარჩენები არ არიან ასეთი კარგები და რა ვქნათ, ჩვენ ხომ არ შევქმნით ოპოზიციას? „ოცნებაც“ ამ როლშია, სამწუხაროდ“ - განაცხადა გიორგი მარგველაშვილმა