„ახალი ძალების მოძრაობის“ ლიდერი, მიხეილ სააკაშვილი იურისტებთან ერთად, უკრაინის საიმიგრაციო სამსახურში იმყოფებოდა, სადაც დროებითი თავშესაფრის მოთხოვნაზე ოფიციალური პასუხი მოითხოვა. სააკაშვილის თქმით, მას უწყებამ ოფიციალური დოკუმენტის ნაცვლად პრესრელიზი გადასცა:

„ყველა მათგანი ან დებილია, ან იდიოტია, ან ჩვენ ვგონივართ ასეთები. ახლა მითხრეს რომ შემიძლია პრესრელიზი გავასაჯაროო. აი თქვენი პრესრელიზი...“- განაცხადა სააკაშვილმა და უწყების მიერ გადაცემული დოკუმენტი კამერების წინ დახია.

სააკაშვილის განცხადებით, როდესაც მას ასე ექცევიან, ადვილი წარმოსადგენია, როგორ მოექცევა უკრაინის ხელისუფლება რიგით მოქალაქეებს.

„ხომ ნახეთ როგორ გვექცევიან, ხალხს როგორ შეიძლება ქონდეს იმედი, რომ სახელმწიფო მათ სიმართლეს დაიცავს. მე, რომელსაც იურიდიული განათლება მაქვს, ვიყავი პრეზიდენტი და მიცნობს ყველა, ცდილობენ დამცინონ და რიგით ადამიანებს რას გაუკეთებენ? რამდენ ხანს უნდა ქონდეთ ამის უფლება? თქვენს თვალწინ ამ ადამიანმა 4-ჯერ იცრუა, გუშინ გენერალურმა პროკურორმა მოიტყუა ტელეკამერების წინ, პრეზიდენტმა იმდენჯერ იცრუა უკვე რეკორდიც დაამყარა. რამდენჯერ შეიძლება ხალხი მოატყუო და ასე მოექცე? გასაგებია, რატომ უნდათ ქვეყნიდან ჩემი გაძევება“- აღნიშნა სააკაშვილმა.

სააკაშვილის განცხადებით , უკრაინის პრეზიდენტის ადმინისტრაციამ მას ბოლოს და ბოლოს გადასცა დოკუმენტები მოქალაქეობის ჩამორთმევასთან დაკავშიერებით და ის აპირებს აღნიშნული გადაწყვეტილება სასამართლოში გაასაჩივროს.

შეგახსენებთ, უკრაინის საიმიგრაციო სამსახურის განცხადებით დაცვის დამატებით ღონისძიებებთან დაკავშირებით მიხეილ სააკაშვილს განცხადების განხილვა პროცედურების დარღვევის გამო არ მოხდა. შესაბამისი ინფორმაცია უწყებამ გუშინ გაავრცელა. მათი თქმით სააკაშილის განცხადება საიმიგრაციო სამსახურში კანონდარღვევით იქნა წარდგენილი.