უკვე მეორე კვირაა ქვეყანაში რეალური რეფორმების გატარების მოთხოვნით უკრაინის რადასთან საპროტესტო აქციები მიმდინარეობს, რომლის მთავარი ორგანიზატორი უკრაინული პარტიის „ახალ ძალთა მოძრაობის“ ლიდერი მიხეილ სააკაშვილია. სააკაშვილის თქმით, მას სცენარის არანაირი განვითარება არ აშინებს. როგორც სააკაშვილი აცხადებს, უკრაინის ხელისუფლებამ მისთვის მოქალაქეობის ჩამორთმევით, საკუთარ თავს „გაუჩალიჩა“, რადგან მისი ქვეყანაში დატოვებაც და ქვეყნიდან გაშვებაც მათ სიტუაციას ართულებს:

„უკრაინის კორუმპირებული-ოლიგარქიული ხელისუფლებისთვის ერთის მხრივ ჩემი აქ ყოფნა არის კატასტროფა იმიტომ, რომ სიტუაცია უყირავდებათ, მეორეს მხრივ ჩემი გაგდებაც არის კატასტროფა, იმიტომ რომ აუყირავდებათ ნამდვილად. ახლა არიან იმ სიტუაციაში, რომელიც თავის თავს თვითონ გაუჩალიჩეს. ჩვენ ვაგრძლებთ იმას რასაც ვაკეთებდით მე სცენარის არანაირი განვითარება არ მაშინებს. ჩვენი აქ ყოფნის შედეგი არის ის რომ დაიწყეს უკვე განხილვა ყველა კანონის რომელზეც ჩვენ ვლაპარაკობდით, მეორე არის ის რომ ეშინიათ, შიშისაგან ხან რა სისულელეს იძახიან ხან რას. გუშინ მთელი ლაპარაკი იყო იმაზე, რომ 20 ქართველი აპირებს უკრაინაში სახელმწიფო გადატრიალებას, მეტი რაღა უნდა ილაპარაკონ, იმდენად არ არიან თავის თავში დაწმუნებულები და ისეთ რაღაცეებს იგონებენ, პუტინსაც არ მოსვლია თავში და არც ჩვენ გიჟებს საქართველოში“- განაცხადა სააკაშვილმა.

სააკაშვილი მისი დაცვის სამსახურის წევრების საქართველოში დეპორტაციის თემასაც გამოეხმაურა და განაცხადა, რომ ეს მისი მისამართით გაგზავნილი მესიჯი იყო.

„ამით მესიჯი გამომიგზავნეს, რომ შენც იგივეს გიზამთ, მე ვარ იმ ბრძოლაში სადაც ზოგს კლავენ, ზოგს ადეპორტებენ, მაგრამ ბოლოს მაინც გავიმარვებთ“- აღნიშნა სააკაშვილმა "რუსთავი2"-თან საუბრისას.