„ერთიანი ნაციონალური მოძრაობის“ წევრის ზაზა ბიბილაშვილის თქმით არჩევნები დარღვევებით მიმდინარეობს. ბიბილაშვილმა აქცენტი გააკეთა „ქართული ოცნების“ აქტივისტების მიერ არჩევნებზე მისული ამომრჩევლების აღრიცხვაზე:

„არჩევნები მიმდინარეობს მძიმე დარღვევებით, მხოლოდ ჩვენი დამკვირვებლების მხრიდან შეტანილია 100-ზე მეტი საჩივარი, საქართველოს მასშტაბით შეტანილია 200 საჩივარი და საჩივრების რაოდენობა ყოველწუთიერად მატულობს. მთავარი დარღვევა არის ის რომ „ქართული ოცნების“ დამკვირვებლები დგანან რეგისტრატურის მაგიდის უკან და ისინი უკანონოდ აღრიცხავენ და ახდენენ ამომრჩევლის იდენტიფიცირებას, იმისთვის, რომ შემდგომ ის ამომრჩეველი რომელიც წინასწარ ჰყავდათ შეთანხმებული და დაბევებული მიიყვანონ საარჩევნო უბანზე და ხმა იძულებით მიაცემინონ. ეს განცხადება გაკეთდა დაახლოებით ერთი საათის წინ, თუმცა ცესკოს და მის თავმჯდომარეს არანაირი რეაგირება არ მოუხდენია ამ ძალიან მძიმე დარღვევაზე. ჩვენ ვაპირებთ მივიდეთ ცესკოში და ამაზე მოვითხოვოთ პასუხი.“- განაცხადა ზაზა ბიბილაშვილმა.

ენმ-ს წარმომადგენლის თქმით უმძიმეს პრობლემად იკვეთება მიწერების საკითხიც. ბიბილაშვილის განცხადებით სხვადასხვა მისამართზე ჩაწერილი არიან ადამიანები, რომლებსაც სახლის მესაკუთრეები არც კი იცნობენ.