„ქართული მარში“ არჩევნებს ბოიკოტს უცხადებს და ოპოზიციას ხელისუფლებასთან გარიგებაში ადანაშაულებს

პოლიტიკა - 16:35, 20 Oct, 2017

2108

„ქართული მარში“ 2017 წლის 21 ოქტომბერს დაგეგმილ თვითმმართველობის არჩევნებს ბოიკოტს უცხადებს, ამის შესახებ განცხადება დღეს გამართულ პრესკონფერენციაზე მოძრაობის ერთ-ერთმა ლიდერმა სანდრო ბრეგაძემ გააკეთა.

სანდრო ბრეგაძის თქმით, დღევანდელ პირობებში ოპოზიციური კანდიდატების გამარჯვება გამორიცხულია, რადგან როგორც თბილისში ასევე რეგიონებშიც მიმდინარეობს ხმებით ვაჭრობა და ოპოზიციური ძალის წარმომადგენლები მხარს მმართველი ძალის კანდიდატებს უჭერენ. ბრეგაძემ ამის მაგალთად „პატრიოტთა ალიანსის“ წევრი ფრიდონ ინჯია მოიყვანა და აღნიშნა, რომ ოპოზიციური ძალის სიის მეორე ნომერი მხარს უჭერს არა თავისი პარტიის ლიდერს, ირმა ინაშვილს, არამედ კახა კალაძეს.

მისი აზრით, ბოიკოტის გამოცხადების შემდეგ, არჩევნებში საქართველოს მოსახლეობის 50%-ზე ნაკლები მივა, რაც იმის მაჩვენებელი იქნება, რომ დამტკიცებული ადგილობრივი თვითმმართველობა არის დაბალი ლეგიტიმაციის.

„ეს იქნება გზავნილი იქნება მსოფლიოსათვისაც, რომ ეს საკრებულოები, მერები, გამგებლები არ წარმოადგენენ საქართველოს მოსახლეობის უმრავლესობის ნებას“- განაცხადა სანდრო ბრეგაძემ.

ბრეგაძის განცხადებით, მათ ოპოზიციურ პარტიებს ბოიკოტისკენ მოუწოდეს, თუმცა ისინი ამაზე არ დათაბხმდნენ:

„როდესაც იცი, რომ შანსი არ გაქვს არჩევნებში, რატომ მიდიხარ? იმიტომ, რომ სხვა რაღაც გაინტერესებს. ბოკერიას პარტია მმართველი გუნდის ხელდასხმით არის შექმნილი და ხოშტარია „ქართული ოცნების“ თამაშს თამაშობს.“- განაცხადა ბრეგაძემ.