„ახალგაზრდა იურისტთა ასოციაციამ“ წინასაარჩევნო შუალედური ანგარიში წარადგინა, სადაც ასახულია ოპოზიციური პარტიების კანდიდატებზე ღია ზეწოლა და მუქარა წინასაარჩევნო კამპანიის პერიოდში. „საია"-ს თავმჯდომარე დარღვევებზე არასათანადო რეაგირებაზე საუბრობს.

„ამ წინასაარჩევნო პერიოდში დაფიქსირდა ზეწოლა-მუქარის ფაქტები და განსაკუთრებით შემაშფოთებელია შემთხვევები, როდესაც ჩნდება დასაბუთებული ეჭვები, რომ ოპოზიციური პოლიტიკური პარტიების წარმომადგენლებმა სწორედ ზეწოლების შედეგად მოხსნეს თავიანთი კანდიდატურები. ასეთი ფაქტები საჭიროებს ძალიან სწრაფ და სრულყოფილ გამოძიებას. ასევე იყო ფიზიკური ანგარიშსწორების ფაქტები. უკანონო აგიტაციაში მონაწილეობის, ადმინისტრაციული რესურსის გამოყენების ფაქტები,“ - განაცხადა ანა ნაცვლიშვილმა.

„ახალგაზრდა იურისტთა ასოციაციის“ ინფორმაციით, მუქარა-ზეწოლების ფაქტებს ძირითადად ადგილი ჰქონდა სამცხე ჯავახეთში, სამეგრელოში და ქვემო ქართლში.