"ეროვნულ დემოკრატიული ინსტიტუტის" წარმომადგენლები დღესვე შეხვედრებიან პოლიტიკური პარტიების ლიდერებს. საპარლამენტო ოპოზიცია ხელისუფლების მხრიდან ადმინისტრაციული რესურსების გამოყენებასა და მათ კანდიდატებზე არსებულ წეზოლაზე აპირებს ყურადღების გამახვილებას.

NDI- ის წარმომადგენლებს შეხვდებიან უმრავლესობის ლიდერები. მათი თქმით, მათთვის მნიშვნელოვანია საერთაშორისო ორგანიზაციების მხრიდან დეტალური და ობიექტური დაკვირვება საარჩევნო პროცესზე.

„ჩვენგან იქნება ერთი მთავარი საკითხი დაყენებული, წამოწეული და ხაზგასმული რომ რაც შეიძლება მეტი, რაც შეიძლება ინტენსიური და რაც შეიძლება კომპეტენტური ზედამხედველობა გაუწიონ მომავალ არჩევნებს,“-აცხადებს გია ვოლსკი.

ადმინისტრაციული რესურსის გამოყენებაზე გაამახვილებენ ყურადღებას „ნაციონალურ მოძრაობაშიც.“ სალომე სამადაშვილი კანდიდატებზე ზეწოლის ფაქტებზეც საუბრობს.

„ჩვენ ყურადღებას გავამახვილებთ პირველ რიგში ადმინისტრაციული რესურსების ბოროტად გამოყენებაზე, ფაქტიურად ზეწოლა მიმდინარეობს მათ შორის ოპოზიციის კანდიდატებზე იმისთვის, რომ მათ მოხსნან საკუთარი კანდიდატურა არჩევნებიდან,“-აცხადებს სალომე სამადაშვილი.

„ევროპული საქართველოს“ წევრი, გიგი წერეთელი საარჩევნო პროცესში ადმინისტრაციული რესურსის გამოყენებაზე ისაუბრებს.

„ძალიან ხშირია საჯარო მოსამსახურეების ჩართულობა და ზეგავლენების მოხდენა, როგორც კომისიის წევრებზე საარჩევნო, ასევე ამომრჩევლებზე. ეს რა თქმა უნდა არის დაუშვებელი, ეს კანონითაც აკრძალულია და ვფიქრობ ეს იქნება ალბათ ყურადღების საგანი,“ - აცხადებს გიგი წერეთელი.