საქართველოს სახალხო დამცველმა ზოგადსაგანმანათლებლო დაწესებულებებში მოსწავლეთა მიმართ ძალადობის კუთხით არსებული მდგომარეობის შესახებ სპეციალური ანგარიში წარმოადგინა. როგორც ანგარიშშია აღნიშნული ზოგადსაგანმანათლებლო სისტემაში გამოწვევად რჩება მოსწავლეთა დაცვა ძალადობრივი დამოკიდებულებისა და არასათანადო მოპყრობისაგან.

აღნიშნულს „ნიუპოსტთან“ საუბრისას განათლების ყოფილი მინისტრი დიმიტრი შაშკინი აფასებს. შაშკინი მიიჩნევს, რომ მსგავსი შედეგი მანდატურების ინსტიტუტის შინაარსობრივ განადგურებას უკავშირდება და საჯარო სკოლები საქართველოში სწორედ ამიტომ აღარ არის უსაფრთხო:

„სამწუხაროდ დადასტურდა სახალხო დამცველისა და საერთაშორისო ორგანიზაციის მიერ ის, რაზეც მე ვსაუბრობდი ბოლო სამი წლის განმავლობაში. „ქართულმა ოცნებამ“ შინაარსობრივად გაანადგურა მანდატურების ინსტიტუტი, რომლის მეშვეობითაც ჩვენ დავამყარეთ წესრიგი სკოლებში და გავხადეთ საჯარო სკოლები უსაფრთხო.

ევროკავშირის მიერ 2011 წელს დაფინანსებულმა კვლევამ გვაჩვენა, რომ მშობლების 73%-მა განაცხადა, რომ ჩვენი სკოლები არის უსაფრთხო, 2010-ში ასეთი იყო მხოლოდ 4%. მანდატურების სისტემა იყო ერთ-ერთი ყველაზე წარმატებული რეფორმა, რომელიც განხორციელდა.

ეს არის ძალიან ცუდი და სამწუხარო შედეგი, განათლების სამინისტროს უკვე აქვს პრობლემა, რომ ეს ყველაფერი მიაწეროს სახალხო დამცველის პოლიტიკურ ინტერესებს, მაგრამ განათლების სამინისტროს ავიწყდება, რომ ეს კვლევა არის ჩატარებული არა მხოლოდ ომბუდსმენის მიერ, არამედ იუნისეფის მიერ, რომელსაც აქვს საკმაოდ მაღალი ავტორიტეტი მსოფლიოში. ზუსტად სამ წელიწადში, მას შემდეგ რაც „ქართულმა ოცნებამ“ შინაარსობრივად გაანადგურა მანდატურების ინსტიტუტი, დატოვეს მხოლოდ დარაჯებად ეს ხალხი. სამ წელიწადში მივიღეთ ის, რომ ძალადობა დაბრუნდა სკოლებში, ეს არის მიუღებელი. ძალიან მტკივნეულია, მაგრამ უნდა ვთქვათ, რომ ჩვენი სკოლები აღარ არის უსაფრთხო. მას შემდეგ რაც საჯარო სკოლებში დავამყარეთ სკოლებში, უნდა აღინიშნოს, რომ მშობლებმა 25 ათასი ბავშვი კერძო სკოლებიდან საჯარო სკოლებში გადაიყვანეს. კვრევამ, რომელიც საერთაშორისო ორგანიზაციებმა ჩაატარეს, დაადასტურა, რომ ამ გადაყვანების მიზეზი სწორედ მანდატურების ინსტიტუტი იყო. ეს ყველაფერი სამწუხაროდ განადგურდა და ეს არის პირდაპირი პასუხისმგებლობა, მარგველაშვილის, როგორც განათლების ყოფილი მინისტრის, სანიკიძისა და ჯეჯელავასი“, - აცხადებს დიმიტრი შაშკინი.

ანგარიშში ასახულია საქართველოს ზოგადსაგანმანათლებლო დაწესებულებებში ჩატარებული მონიტორინგის შედეგები, რომელიც სახალხო დამცველის ბავშვის უფლებების ცენტრმა გაეროს ბავშვთა ფონდის (UNICEF) მიერ მხარდაჭერილი პროექტის „სახალხო დამცველის აპარატის ბავშვის უფლებების ცენტრის გაძლიერების“ ფარგლებში ჩაატარა. ბავშვის უფლებების ცენტრმა 2016–2017 სასწავლო წლის განმავლობაში მთელი საქართველოს მასშტაბით 109 ზოგადსაგანმანათლებლო დაწესებულება, მათგან 98 საჯარო სკოლა, 5 კერძო და 6 სკოლა–პანსიონი შეამოწმა.