ივანიშვილისთვის მიწების გადაცემის საკითხი - ოპოზიციამ სასამართლოში სარჩელი შეიტანა

პოლიტიკა - 15:22, 17 Oct, 2017

1013

საკრებულოს ოპოზიციური ფრაქციების წარმომადგენლებმა საქალაქო სასამართლოში სარჩელი შეინატეს. დეპუტატები საკრებულოს იმ გადაწყვეტილებების გაუქმებას ითხოვენ, რომლის მიხედვითაც ბიძინა ივანიშვილის კუთვნილ კომპანიას პუშკინის სკვერის და თაბორის მთის მიმდებარე ტერიტორიაზე მიწის ნაკვეთები გადაეცა.

ფრაქცია „ნაციონალური მოძრაობის" წევრის მარიკა დათუკიშვილის განცხადებით, საუბარია საკრებულოს ორ გადაწყვეტილებაზე. ერთ-ერთი მათგანი შეეხება 29 სექტემბრის გადაწყვეტილებასაც რომლის მიხედვითაც, ზონალური სტატუსი შეეცვალა პუშკინის სკვერის მიმდებარე ტერიტორიას და ასევე თაბორის მთის ნაწილს.

„ჩვენ მოვითხოვთ, რომ გაუქმდეს საკრებულოს 29 სექტემბრის გადაწყვეტილება. ისევე, როგორც უნდა გაუქმდეს საკრებულოს 10 ოქტომბრის გადაწყვეტილება. ერთ შემთხვევაში, როდესაც ბიძინა ივანიშვილისთვის გამზადებულ ნაკვეთებს მოეხსნა ზონალური სტატუსი და მეორე შემთხვევაში, როდესაც უკვე ეს ნაკვეთები გასხვისდა ბიძინა ივანიშვილზე. ამავდროულად, ჩვენ მოვითხოვთ დაუყოვნებლივ შეჩერდეს ამ გადაწყვეტილებების აღსრულება,“ - განაცხადა მარიკა დათუკიშვილმა.

საკრებულოს ფრაქცია „მოძრაობა თავისუფლებისთვის - თბილისის”თავმჯდომარის განცხადებით, გადაწყვეტილების მიხებისას ყველანაირი ნორმა იქნა დარღვეული.

„34 ხმა იყო საჭირო გადაწყვეტილების მისაღებად და 29 ხმით მიიღეს. ეს არის სისხლის სამართლის დანაშაული,“ - განაცხადა მამუკა ახვლედიანმა.