რეგიონებში ოპოზიციის კანდიდატებზე ზეწოლა და ადმინისტრაციული რესურსის გამოყენების ფაქტები ხელისუფლების მხრიდან წინასაარჩევნოდ - დღეს ლიდერთა საბჭომ საერთაშორისო ორგანიზაციების წარმომადგენლებსა და დიპლომატიურ კორპუსს არსებულ სიტუაციაზე ინფორმაცია მიაწოდა.

„ახალი საქართველოს“ თბილისის მერობის კანდიდატი, გიორგი ვაშაძე მმართველი გუნდის მხრიდან არჩევნებისთვის ამომრჩევლის მოსყიდვის საკითხზე საუბრობს:

„შავი ფული, რომელიც ტრიალებს არჩევნებში, ეს არის ხელზე გადახდა ხმისთვის, ამას განსაკუთრებით იყენებს „ქართული ოცნება“ და მასთან დაახლოებული ოპოზიციური პარტიები, ეს არის არჩევნების ფალსიფიცირების მთავარი პრობლემა, თითო ხმა „ქართულმა ოცნებამ“ უკვე აიყვანა 30-50 ლარზე, რამხელა თანხებზეა საუბარი, 75 ათასი ადამიანი ჰყავს ასე არალეგალური გადახდით მთელი საქართველოს მასშტაბით“, - აცხადებს გიორგი ვაშაძე.