უმრავლესობამ პრეზიდენტის ვეტო დაძლია - " ოცნებამ გადაწყვიტა დადგომოდა გაყოფის და არა გაერთიანების გზას"

პოლიტიკა - 16:47, 13 Oct, 2017

1010

პრეზიდენტის საპარლამენტო მდივანი ანა დოლიძე საპარლამენტო უმრავლესობის მიერ პრეზიდენტის ვეტოს დაძლევის საკითხზე პირველ კომენტარს აკეთებს.

მისი თქმით ქართული ოცნება გაყოფის გზას დაადგა.

"დღეს ოცნებამ გადაწყვიტა დადგომოდა გაყოფის და არა გაერთიანების გზას. დადგომოდა ერთპარტიულობის და არა მრავალპარტიულობის გზას. გუშინ, კომიტეტის სხდომაზე, რომლის ჩანაწერის ამოღებაც შეგიძლიათ, მე დაწვრილებით ჩამოვთვალე იმ პარტიების ისტორია, რომლებიც დღეს ოპოზიციურ სპექტრში არიან წარმოდგენილნი. არ ვფიქრობ, რომ ვინმეს ღირსებაზე მეტყველებს, რომელიმე პარტიის, ოპოზიციური იქნება ეს თუ სამთავრობო, პარტიის დამცირება, იმიტომ რომ ისინი ჩვენს პოლიტიკურ სპექტრს წარმოადგენენ. დღეს მივიღეთ კონსტიტუცია, რომელიც მხარდაჭერილია მხოლოდ უმრავლესობის მიერ. ეს ჩვენი რეალობისთვის, ვენი ქვეყნის დემოკრატიულობისთვის სახარბიელო არ არის და ჩვენ მხოლოდ წუხილი შეგვიძლია გამოვთქვათ ამასთან დაკავშირებით"- განაცხადა ანა დოლიძემ.

საპარლამენტო უმრავლესობამ საკონსტიტუციო ცვლილებებზე პრეზიდენტის ვეტო 117 ხმით 7-ის წინააღმდეგ დაძლია.

მმართველმა გუნდმა პრეზიდენტის პოზიცია არ გაიზიარა.

გიორგი მარგველაშვილის მოტივირებული შენიშვნების განხილვა საკანონმდებლო ორგანოში მწვავე კამათისა და ურთიერთბრალდებების ფონზე მიმდინარეობდა.

ასევე კენჭი ეყარა აჭარის ავტონომიური რესპუბლიკის შესახებ კონსტიტუციურ კანონპროექტს, რომელზეც უმრავლესობამ პრეზიდენტის ვეტო დაძლია და პირვანდელი რედაქცია 117 ხმით 3-ის წინააღმდეგ მიიღო.