"პროკურატურის სამარცხვინო საქციელი და სიბინძურე" - ზაზა ხატიაშვილი დეკანოზის ადვოკატების დაკითხვაზე დაბარებას დაშინებათ აფასებს

პოლიტიკა - 12:09, 13 Oct, 2017

1533

ადვოკატთა ასოციაციის თავმჯდომარემ დეკანოზ გიორგი მამალაძის ადვოკატების დაკითხვაზე დაბარებას კიდევ ერთხელ ეხმაურება. ზაზა ხატიაშვილი ამბობს, რომ "საქმე გვაქვს ადვოკატების დაშინების მცდელობასთან".
მისი შეფასებით, დაუშვებელია ადვოკატს აიძულო იმ საქმეზე ჩვენების მიცემა, რა საქმეზეც ის საკუთარ უფლებამოსილებას ახორციელებდა.

„ეს არის არნახული ზეწოლა თავისუფალ პროფესიაზე, ადვოკატზე, ეს არის სამარცხვინო და სიბინძურე, რომელიც ჩაიდინა პროკურატურამ. ადვოკატებს იბარებენ 374-ე მუხლით, რომელიც მოიცავს სამძებრო საქმიანობას და გამოძიების მასალების გამჟღავნების გამო პირის პასუხისმგებლობას. იბარებენ ადვოკატებს და ეუბნებიან მოგვეცით ჩვენებები, თუ როგორ მოხვდა სასამართლოდან ტელეკომპანიებში საქმის მასალები. ეს სამარცხვინო ფაქტია და ყველა საერთაშორისოდ აღიარებული ნორმის დარღვევაა“, - განაცხადა ზაზა ხატიაშვილმა.

ციანიდის საქმის ადვოკატები მაგისტრი მოსამართლის თანდასწრებით ჩვენების მისაცემად დაიბარეს. საქმე ეხება მოწმეთა ჩვენებების მედიასაშუალებებში გასაჯაროების ფაქტს.

ადვოკატები სასამართლოში 13:00 საათზე უნდა მივიდნენ. ცნობისთვის, საქმესთან დაკავშირებით, დეკანოზის უფლებადამცველები პროკურატურაშიც იმყოფებოდნან, თუმცა მათ ჩვენების მიცემაზე უარი განაცხადეს.

დღეს სასამართლოში ციანიდის საქმის სამ ადვოკატს - სულხან კობახიძეს, პაატა მეხრიშვილს და მიხეილ რამიშვილს ელოდებიან.

როგორც პაატა მეხრიშვილმა ჟურნალისტებთან საუბრისას აღნიშნა, მათ აქვთ უფლება არ მისცენ ჩვენება, რომელიც მათთვის ცნობილი გახდა პროფესიული მოვალეობის შესრულების დროს. მეხრიშვილის თქმით რომ გამოძიებას ჩვენებას არც მაგისტრი მოსამართლის თანდასწრებით არ მისცემს.