"რუსეთის აგრესიული პოლიტიკა დღესაც გრძელდება"- გიორგი კვირიკაშვილი

პოლიტიკა - 10:47, 12 Oct, 2017

933

ბათუმში მიმდინარე თავდაცვისა და უსაფრთხოების კონფერენციაზე სიტყვით საქართველოს პრემიერ-მინისტრიც გამოვიდა. გიორგი კვირიკაშვილმა ყურადღება ოკუპირებულ ტერიტორიებზე არსებულ ვითარებაზე გაამახვილა და განაცხადა , რომ რუსეთის აგრესიული პოლიტიკა დღესაც გრძელდება და რუსეთის მიერ საოკუპაციო რეჟიმის განგრძობითი მილიტარიზაცია ხდება:

„დღესაც გრძელდება მათი აგრესიული პოლიტიკა, რომელიც აისახება ისეთ პროცესებში, როგორიცაა ოკუპირებული ტერიტორიების შთანთქმა, რუსეთის სამხედრო უსაფრთხოების პოლიტიკურ, ეკონომიკურ და სოციალურ სივრცეებში. ე.წ. ინტეგრაციის შესახებ შეთანხმებების მეშვეობით, უკანონო რეფერენდუმებით თუ სხვადასხვა პროგრამებით. განგრძობითი მილიტარიზაცია, რომელიც გამოხატულია დამატებითი სამხედრო ძალების მობილიზებით ოკუპირებულ ტერიტორიებზე და ათეულობით გამართული სამხედრო წვრთნით, მხოლოდ 2017 წლის განმავლობაში. მაქსიმალური იზოლაცია ოკუპირებული ტერიტორიებისა, გამოხატული როგორც ე.წ. გადასასვლელების დაკეტვაში, ასევე მავთულხლართები და არხების მშენებლობაში საქართველოს ტერიტორიაზე. ეთნიკური დისკრიმინაცია და წმენდა, ასევე ქართული სოფლების და დასახლებული პუნქტების კვალის სრული წაშლით.“- განაცხადა გიორგი კვირიკაშვილმა.

ბათუმში თავდაცვისა და უსაფრთხოების კონფერენცია იმართება, რომლის მთავარი საკითხები საქართველოს ნატო-ში ინტეგრაცია, უსაფრთხოება და საქართველოს შეიარაღებული ძალების რეფორმაა. ღონისძიებას ქვეყნის უმაღლესი მთავარსარდალი, მთავრობის მეთაური და სხვა მაღალი რანგის პოლიტიკოსები ესწრებიან. კონფერენციაში ნატო-ს გენერალური მდივნის სპეციალური წარმომადგენელი ჯეიმს აპატურაი მონაწილეობს.