NATO-საქართველოს თანამშრომლობის გაღრმავებას რუსეთი რეგიონის უსაფრთხოებისთვის მუქარად მიიჩნევს

პოლიტიკა - 10:20, 12 Oct, 2017

1651

რუსეთი საქართველოსა და NATO-ს თანამშრომლობის გაღრმავებას რეგიონის უსაფრთხოებისთვის რეალურ საფრთხედ მიიჩნევს. ამასთან დაკავშირებით რუსეთის საგარეო უწყებამ განცხადება გაავრცელა. უწყების თქმით რეგიონში ნატოს გააქტიურება და მისი ქმედებები ჟენევის ფორმატის მუშაობას აუფასურებს.

„ჩრდილოატლანტიკური ალიანსის სწავლებებში, რომელიც ამ წლის ზაფხულში და შემოდგომაზე საქართველოში გაიმართა, მონაწილეობას იღებდა ჯარისკაცების და მძიმე ტექნიკის რეკორდული რაოდენობა.

ნატოს ცალკეული ქვეყნების ემისრები, რომლებიც წვრთნას ესწრებოდნენ, ხაზს უსვამდნენ ამ მანევრების ანტირუსულ მიმართულებას და ყურადღებას ამახვილებდნენ წვრთნებზე, როგორც სამხრეთ ოსეთის „დეოკუპაციისთვის“ მნიშვნელოვან ფაქტორზე. თბილისის და ალიანსის წევრების ასეთი ქმედებები ჟენევის მოლაპარაკებების მიზნებს ეწინააღმდეგება, აუფასურებს ფორმატის მუშაობას და რეგიონში დაძაბულობის ზრდას იწვევს. მიუღებელ და პროვოკაციულ ხასიათს ატარებდა ჟენევის მორიგ რაუნდამდე, ნატოს საპარლამენტო ასამბლეის მიერ ბუქარესტში მიღებული რეზოლუციაც.“- აღნიშნულია განცხადებაში.