წმინდა სინოდი არ მიიჩნევს მიზანშეწონილად, სააპელაციო პროცედურების დასრულებამდე, დეკანოზ მამალაძის საქმის განხილვას

პოლიტიკა - 22:25, 11 Oct, 2017

1728

საქართველოს საპატრიარქომ წმინდა სინოდის სხდომის ოქმი გაავრცელა, სადაც საუბარია იმ საკითხებზე, რომელიც მღვდელმთავრების მიერ იქნა განხილული. მათ შორისაა ე.წ. ციანიდის საქმე, რომლის შესახებაც აღნიშნულია, რომ საკითხი დააყენა ჭყონდიდელმა მიტროპოლიტმა პეტრემ, ხოლო რაც შეეხება სინოდის გადაწყვეტილებას, სხდომის ოქმის თანახმად, ,,მოცემულ ეტაპზე, ვიდრე დეკანოზ გიორგი მამალაძის განაჩენის მიმართ სააპელაციო-საკასაციო პროცედურები არ არის დასრულებული, წმიდა სინოდი არ მიიჩნევს მიზანშეწონილად კანონიკური სამართლის ფორმატში დაიწყოს დეკანოზ გიორგი მამალაძის საქმის განხილვა“.

,,წმიდა სინოდმა დაადგინა:

მიუხედავად იმისა, რომ დეკანოზ გიორგი მამალაძის მიმართ საქალაქო სასამართლომ გამოიტანა გამამტყუნებელი განაჩენი და მას მიუსაჯა ცხრა წლით თავისუფლების აღკვეთა, დღეისთვის განაჩენი გასაჩივრებულია სააპელაციო სასამართლოში; ასევე იმის გამო, რომ ამ საკითხის ირგვლივ არსებობს მაღალი საზოგადოებრივი ინტერესი და გამოითქმის ურთიერთგამომრიცხავი პოზიციები, მოცემულ ეტაპზე, ვიდრე დეკანოზ გიორგი მამალაძის განაჩენის მიმართ სააპელაციო-საკასაციო პროცედურები არ არის დასრულებული, წმიდა სინოდი არ მიიჩნევს მიზანშეწონილად კანონიკური სამართლის ფორმატში დაიწყოს დეკანოზ გიორგი მამალაძის საქმის განხილვა, რაც ამ საქმის ირგვლივ არსებულ მდგომარეობას კიდევ უფრო დაამძიმებდა. შესაბამისად, წმიდა სინოდი თავს იკავებს დეკანოზ გიორგი მამალაძის მიმართ საბოლოო დასკვნების გაკეთებისგან.

აღნიშნული სააპელაციო-საკასაციო პროცედურების დასრულების შემდგომ წმიდა სინოდი საეკლესიო კანონების მიხედვით საფუძვლიანად შეისწავლის საქმის არსს, რაც ეკლესიაში საბოლოო ერთიანი პოზიციის ჩამოყალიბებას შეუწყობს ხელს” - ნათქვამია სინოდის განჩინებაში.