,,პოლიციას უსირცხვილოდ არღვევინებენ კანონს და ეს ქვეყანას ძვირი დაუჯდება" - შაშკინი საკრებულოსთან განვითარებულ მოვლენებზე

პოლიტიკა - 20:18, 10 Oct, 2017

1244

თბილისის საკრებულოსთან განვითარებულ მოვლენებს საქართველოს თავდაცვის ყოფილი მინისტრი დიმიტრი შაშკინი ეხმაურება.

როგორც შაშკინი „ნიუპოსტთან“ საუბრისას აღნიშნავს, დღეს სამართალდამცავებს კანონი დაარღვევინეს, ეს კი ქვეყანას მძიმედ დაუჯდება:

„დღეს ყველამ ვნახეთ ძალიან მძიმე სურათი იმისა, თუ რა დღეში იმყოფება საქართველოს სახელმწიფო და ქართული დემოკრატია, აბსოლუტურად უსირცხვილოდ, პოლიციელებს, იმ ხალხს, რომლებითაც ამაყობს ჩვენი სახელმწიფო, არღვევინებენ კანონს, რომელიც ცალსახად ამბობს, რომ საქართველოს პარლამენტის წევრს აქვს უფლება ნებისმიერ დროს, ნებისმიერ შენობაში შევიდეს. ამ პოლიციელებს, რომლებშიც ამდენი ენერგია, ამდენი ფული, ამდენი შრომა არის ჩადებული, ასე უსირცხვილოდ არღვევინებენ კანონს. რაც ყველაზე ცუდია, როდესაც ერთხელ პოლიციელი ასე კანონს დაარღვევს, არანაირი გარანტია არ არსებობს, რომ შემდეგ საკუთარი ინიციატივითაც არ მოიქცევა ასე. ძალიან მძიმეა საუბარი იმაზე, რომ ის საამაყო ინსტიტუტი, რომელიც ყველა ქართველის დამსახურებაა, ასე უსირცვილოდ ინგრევა. დარწმუნებული ვარ, რომ პოლიციელების აბსოლუტური უმრავლესობა ამას ვერ შეეგუება, ასეთ კანონდარღვევასთან შეგუება არის ძალიან მძიმე. ამ ხალხს კანონს არღვევინებენ უფროსები და ძალიან ძვირად დაუჯდება ჩვენს ქვეყანას“, - აცხადებს დიმიტრი შაშკინი.

შეგახსენებთ, რომ დღეს საკრებულოში სხდომა გაიმართა, რომელზეც არ დაუშვეს ოპოზიციის წარმომადგენლები, პარლამენტის დეპუტატები და მათი მხარდამჭერები. საკრებულოს თავმჯდომარის გადაწყვეტილებით, შენობას ასეულობით სამართალდამცავი იცავდა და მათ შესასვლელები ბლოკირებული ჰქონდათ.