„ჩვენი ხმის გაგონებაც კი აშინებთ, ასე სურს ამ ხელისუფლებას ივანიშვილს ისტორიული თბილისი აჩუქოს“

„ჩვენი ხმის გაგონებაც კი აშინებთ, ასე სურს ამ ხელისუფლებას ივანიშვილს ისტორიული თბილისი აჩუქოს“ - ზაალ უდუმაშვილი

პოლიტიკა - 15:30, 10 Oct, 2017

862

ვითარება თბილისის საკრებულოს შენობასთან - ადგილზე ოპოზიციის წარმომადგენლები და მათი მხარდამჭერები იმყოფებიან. ადგილი ჰქონდა დაპირისპირებას სამართალდამცავებსა და „ერთიანი ნაციონალური მოძრაობის“ მხარდამჭერებს შორის. სამართალდამცავებმა ენმ-ის რამდენიმე მხარდამჭერი, მათ შორის პარტიის ერთ-ერთი ლიდერი კოტე იოსელიანი დააკავეს.

„ნაციონალური მოძრაობის“ მერობის კანდიდატის ზაალ უდუმაშვილის განცხადებით, თბილისის ტერიტორია დარჩება თბილისელებს და არ დაუთმობენ ერთ ლარად ტერიტორიებს ბიძინა ივანიშვილს:

„ალბათ თბილისს არ ახსოვს საერთოდ ასეთი ფაქტი, რომ საკრებულოს შენობა დაეკეტოთ, სამუშაო დღეს დაკეტეს საერთოდ შენობა და არავის აძლევენ საშუალებას შიგნით შევიდეს. ასე სურს ამ ხელისუფლებას, რომ აჩუქოს ბიძინა ივანიშვილს თბილისის ისტორიული ნაწილი, ჩვენ ვდგევართ და ვატარებთ აქციას, ჩვენი ხმის გაგონებაც კი აშინებთ, ცდილობენ, რომ რაც შეიძლება შორს გაგვწიონ, გვაწვებიან, რომ რაც შეიძლება შორი დისტანცია გვეჭიროს, მაგრამ არ გამოვა, ჩვენ ვართ ძალიან ბევრნი, თითოეულ დაკავებულზე აქციის 10 მონაწილე დამატებით გამოვა კიდევ ქუჩაში, რადგან ასე მოპარვით წაყვანა, ეს მეთოდები უკვე აღარ მუშაობს, მიუხედავად იმისა, რომ ეს ხელისუფლება ამ მეთოდებით ცდილობს პოზიციების გამაგრებას, ჩემ თვალწინ მოიპარეს ბესო გაზდელიანი და ცოტნე ტიკაშვილი, ვერ მოვახერხე მათი დაჭერა, შეიყვანეს შიგნით, თითქოს პოლიციის განყოფილება იყოს შიგნით, ისე შეჰყავთ ჩვენი თანამებრძოლები, ცდილობენ ყველა მეთოდით, რომ ამ აქციამ შედეგი არ გამოიღოს, ჩვენ ყოველდღიურად უფროდაუფრო მეტი ვართ და თბილისს დარჩება ის ტერიტორიები, რომლებიც მას ეკუთვნის“, - განაცხადა ზაალ უდუმაშვილმა.