"გამოვრიცხავ „ქართული ოცნებისგან“ ასეთი ტიპის დავალებების მიცემას"- ოხანაშვილი ბაღის თანამშრომლების საქმეს ეხმაურება

პოლიტიკა - 10:25, 09 Oct, 2017

1076

საპარლამენტო უმრავლესობის წევრი ანრი ოხანაშვილი მმართველი გუნდის მიერ საჯარო დაწესებულებების თანამშრომლების საარჩევნო მიზნებისთის გამოყენებას გამორიცხავს და აცხადებს, რომ ბაღების თანამშრომლებს არასამუშაო საათებში პოლიტიკურ შეხვედრებში მონაწილეობის უფლება აქვთ.

„ჩვენი მხრიდან არავინ არ მოუწოდებს არავის, რომ მათ კანონი დაარღვიონ. თუმცა, ჩვენ ვერავის ავუკრძალავთ არასამუშაო საათებში და იმ საათებში, როდესაც მათ კანონმდებლობით ეძლევათ უფლება მიიღონ მონაწილეობა ამა თუ იმ შეხვედრაზე. გამოვრიცხავ პარტია „ქართული ოცნების“ მხრიდან რაიმე ასეთი ტიპის დავალებების მიცემას,“ - განაცხადა საპარლამენტო უმრავლესობის წევრმა ანრი ოხანაშვილმა.

საარჩევნო კამპანიაში ბაღების თანამშრომელთა ჩართვასა და ადმინისტრაციული რესურსის გამოყენებაზე დღეს უწყებათშორისი კომისიის სხდომაზე მსჯელობენ. არასამთავრობო ორგანიზაციები და ოპოზიცია აცხადებს, რომ ბაღის თანამშრომლების გამოყენება „ქართული ოცნების“ თბილისის მერობის კანდიდატის სასარგებლოდ ხდება, მათ მიერ მოქალაქეთა პირადი მონაცემების შესაძლო შეგროვების საქმე კი სისხლის სამართლის ნიშნებს შეიცავს.