ბაღის თანამშრომლების საარჩევნო კამპანიაში ჩართვის საქმეზე NGO-ები გამოძიების დაწყებას მოითხოვენ

პოლიტიკა - 10:17, 09 Oct, 2017

1012

უწყებათშორისი კომისიის სხდომაზე საარჩევნო კამპანიაში ბაღების თანამშრომელთა ჩართვასა და ადმინისტრაციული რესურსის გამოყენებაზე მსჯელობენ.

არასამთავრობო ორგანიზაციები და ოპოზიცია აცხადებს, რომ ბაღის თანამშრომლების გამოყენება „ქართული ოცნების“ თბილისის მერობის კანდიდატის სასარგებლოდ ხდება, მათ მიერ მოქალაქეთა პირადი მონაცემების შესაძლო შეგროვების საქმე კი სისხლის სამართლის ნიშნებს შეიცავს.

„საერთაშორისო გამჭვირვალობა - საქართველოს“ წარმომადგენლის ლევან ნატროშვილის თქმით ამ საკითხზე გამოძიება უნდა დაიწყოს, რადგან საქმე შესაძლოა უფლებამოსილების ბოროტად გამოყენებასთან გვქონდეს.

„გამოძიება უნდა დაიწყოს ამ საქმეზე ვინაიდან, ეს სისხლის სამართლის ნიშნებსაც შეიცავს, უფლებამოსილების ბოროტად გამოყენებაა რეალურად, როდესაც შენ რთავ საბიუჯეტო ორგანიზაციაში დასაქმებულ ადამიანებს მათი ნების საწინააღმდეგოდ პოლიტიკურ პროცესებში. სამართლებრივი გამოძიება თუ დაადგენს, რომ ნამდვილად ჰქონდა ამ ფაქტს ადგილი, არა მარტო სისხლის სამართლებრივად უნდა დაისაჯოს ზოგიერთ პირი, ასევე ის ადამიანები, რომლებიც ჩართულები იყვნენ და ასრულებდნენ მათ დავალებებს, როგორც მინიმუმ პოლიტიკური პასუხისმგებლობა უნდა დადგეს მათი,“ - განაცხადა ლევან ნატროშვილმა.