თუ საერთო დებატების ფორმატზე შეთანხმება ვერ მოხერხდა მმართველი გუნდის მერობის კანდიდატი კონკრეტულ ტელევიზიებში მისვლის გადაწყვეტილებას ინდივიდუალურად მიიღებს. კალაძის თქმით დებატების ერთიანი ფორმატი ევროპაშიც მიღებული პრაქტიკაა:

„შევთავაზეთ, რომ ყველა თუ მოახერხებთ, რომ ერთად დავჯდეთ, კარგი იქნება. ევროპაშიც მიღებული პრაქტიკაა და ყველა განვითარებულ ქვეყანაში ხდება, რომ არავინ დაგვრჩეს ნაწყენი იმიტომ, რომ შეიძლება, ერთთან მიხვიდე, მეორესთან ვერა, მესამე ნაწყენი დაგრჩეს,“ - განაცხადა კახა კალაძემ.

ქართული ოცნების თბილისის მერობის კანდიდატის საარჩევნო შტაბის ხელმძღვანელი, არჩილ თალაკვაძე, კი ამბობს, რომ კახა კალაძე დებატებზე ყველა ტელევიზიაში მივა, მათ შორის რუსთავი2-შიც:

„ეს არის მედიის გადასაწყვეტი. თუ მედიასაშუალებებს შორის შეთანხმება ვერ მოხდება, ჩვენ დებატებში მონაწილეობას განვაგრძობთ ისე, როგორც ამას აქამდე ვაკეთებდით. სადაც შევძლებთ, ყველგან, ყველა მედიაფორმატში მივიღებთ მონაწილეობას,“ - განაცხადა არჩილ თალაკვაძემ.