"ივანიშვილი განაგრძობს აბუჩად აგდებას"- ელისაშვილი დეპუტატებს საკრებულოს დატოვებისკენ მოუწოდებს

პოლიტიკა - 16:26, 07 Oct, 2017

1398

თბილისის მერობის დამოუკიდებელი კანდიდატი, რომელმაც რამდენიმე დღის წინ საკრებულოში თანამდებობა დატოვა, მის ყოფილ კოლეგებს მოუწოდებს, რომ თავი არ შეირცხვინონ და ივანიშვილის ნოტარიულ ბიუროდ არ იქცნენ. ელისაშვილის თქმით ივანიშვილი მთელ ქალაქს ატყუებს და აბუჩად იგდებს, რადგან პუშკინის სკვერთან არა საერთო სარგებლობის, არამედ თავისი სასტუმროს პარკინგის განთავსებას აპირებს:

"ამ ხნის განმავლობაში, ფაქტია, რომ ქართული ოცნება იტყუებოდა, როდესაც ამბობდა, რომ იქ მუნიციპალური მიწისქვეშა პარკინგი უნდა გაკეთდეს და ყველასთვის უნდა იყოს ეს პარკინგი. დადასტურდა, რომ მხოლოდ და მხოლოდ 30 მანქანაზე იქნება ეს ავტოპარკინგი, რაც იმას ადასტურებს, რომ სინამდვილეში, სწორედ რომ ბიძინა ივანიშვილის სასტუმროსთვის კეთდება ეს პარკინგი და არა საერთო სარგებლობისთვის.მე მსურს, მოვუწოდო თბილისის საკრებულოს, რომ კიდევ ერთხელ ნუ შეირცხვენს საკრებულოს ეს შემადგენლობა თავს. ასევე, მე მინდა, მოვუწოდო ჩემს კოლეგებს, განსაკუთრებით და პირველ რიგში ოპოზიციონერ დეპუტატებს, თბილისის საკრებულოს, ხომ ფაქტია, რომ ბიძინა ივანიშვილი განაგრძობს თბილისის საკრებულოს აბუჩად აგდებას, კიდევ რა მიზეზი უნდათ იმისთვის, რომ წამოვიდნენ. მეტი რაღა უნდა ქნას ბიძინა ივანიშვილმა, რომ კიდევ ერთხელ შეურაცხყოფა მიაყენოს თბილისის საკრებულოს.“ - განაცხადა ალეკო ელისაშვილმა.