,,ხელისუფლება ერთპარტიულ დოკუმენტზე ვენეციის კომისიის კრიტიკულ დასკვნას დადებითად ვერ გაასაღებს"

,,ხელისუფლება ერთპარტიულ დოკუმენტზე ვენეციის კომისიის კრიტიკულ დასკვნას დადებითად ვერ გაასაღებს" - ბაჩუკი ქარდავა

პოლიტიკა - 17:54, 06 Oct, 2017

2929

"ეროვნულ დემოკრატიული" პარტიის ლიდერი ბაჩუკი ქარდავა აღნიშნავს, რომ ვენეციის კომისიის საბოლოო დასკვნა პოლიტიკურ ნაწილში კრიტიკულია. ქარდავას არგუმენტად ჯანი ბუკიკიოს განცხადება მოჰყავს, რომელიც კვლავ წუხილს გამოთქვამს, რომ ქვეყნის უზენაესი დოკუმენტის ირგვლივ სრული კონსენსუსი არ არსებობს.

ამასთან ედპ-ს ლიდერის თქმით, ვენეციის კომისია მხარეებს მოუწოდებს, რომ კონსტიტუციის ამოქმედებამდე დარჩენილი დრო შეთანხმებისთვის.

მისივე განცხადებით, "ხელისუფლება საერთაშორისო ექსპერტების კრიტიკულ დასკვნას დადებითად ვერ გაასაღებს".

"ვენეციის კომისიის დასკვნა სავარაუდოდ ორშაბათს გამოქვეყნდება, თუმცა ვენეციის კომისიის თავმჯდომარის მიერ გაკეთებული განცხადების გათვალისწინებით, რომ ტექნიკური ცვლილებები შევა იმ წინასწარ დასკვნაში რომელიც უკვე გამოქვეყნებული იყო და ჩვენთვის ცნობილია, დღესვე შეგვიძლია მარტივად გითხრათ, რომ იმ ძირითად საკითხებთან დაკავშირებით რამაც საკონსტიტუციო რეფორმის პროცესი ჩიხში შეიყვანა, ეს არის 2020 წელს პროპორციული სისტემის ამოქმედება და კონსენსუსის არარსებობა კვლავ დღის წესრიგში რჩება და ამ საკითხებთან დაკავშირებით ვენეციის კომისია სინანულს გამოთქვამს და ამ ნაწილში ბუნებრივია ვენეციის კომისიის ნეგატიური დამოკიდებულებაა. დასკვნის პოლიტიკური მხარე იგივე - ნეგატიური იქნება. ის ფაქტიც, როცა ბუკიკიო აცხადებს, რომ სანამ კონსტიტუცია ამოქმედდება კიდევ არის დრო მიღწეულ იქნას კონსენსუსი, ესეც იმაზე მიანიშნებს, რომ ხელისუფლების ხისტი პოზიცია არც ქვეყნის შიგნით და მის ფარგლებს გარეთ არავის მოსწონს. ეს არის რეალობა, მეტ დეტალზე საუბარი მას შემდეგ შეგვეძლება, რაც დოკუმენტს გავეცნობით"- აღნიშნა ბაჩუკი ქარდავამ.