“გირჩის“ რელიგიური ორგანიზაცია კახა კალაძეს საყვედურობს, რომ სხვადასხვა რელიგიური კონფესიების წარმომადგენლებთან შეხვედრაზე „ბიბლიური თავისუფლება” არ მიიწვიეს. ამის შესახებ „ბიბლიური თავისუფლება“ განცხადებას ავრცელებს:

“გუშინ, 5 ოქტომბერს ტოლერანტობისა და მრავალფეროვნების ინსტიტუტის ორგანიზებით, პოლიტიკური პარტია „ქართული ოცნების“ დედაქალაქის მერობის კანდიდატი, ბ-ნი კახა კალაძე შეხვდა სხვადასხვა რელიგიური კონფესიების წარმომადგენლებს.

ჩვენ, ბიბლიურმა თავისუფლებამ, აღნიშნული შეხვედრის შესახებ, სამწუხაროდ, მხოლოდ პოსტ ფაქტუმ, მედია საშუალებებიდან შევიტყვეთ.

გვსურს გაცნობოთ, რომ დღევანდელი მდგომარეობით ბიბლიური თავისუფლება არის ყველაზე სწრაფად მზარდი რელიგიური ორგანიზაცია საქართველოში, რომელსაც უკვე ჰყავს 1,300-ზე მეტი მღვდელმსახური, ხოლო facebook-ზე ოფიციალური გვერდის მოწონებების რაოდენობით ბიბლიური თავისუფლება ჩამორჩება მხოლოდ დომინანტი რელიგიის გვერდს.

იმის გათვალისწინებით, რომ ბიბლიური თავისუფლება იბრძვის თავისუფლებისთვის და ამ ბრძოლის ერთერთი უმნიშვნელოვანესი ნაწილია ბრძოლა აღმსარებლობის თავისუფლებისა და რელიგიური ორგანიზაციების თანასწორობისთვის, გვინდა მოგმართოთ თხოვნით, რომ მომავალში აუცილებლად შეგვატყობინოთ მსგავსი ან რაიმე სხვა ტიპის შეხვედრების თაობაზე.

წინასწარ გიხდით მადლობას.პატივისცემით, ბიბლიური თავისუფლება”- ნათქვამია განცხადებაში.