საქართველოს პარლამენტის მუდმივმოქმედი დელეგაცია ნატო-ს საპარლამენტო ასამბლეის 63-ე წლიურ სესიაში მონაწილეობას მიიღებს

პოლიტიკა - 11:09, 06 Oct, 2017

1051

6-9 ოქტომბერს, რუმინეთის დედაქალაქში ბუქარესტში, გაიმართება ნატო-ს საპარლამენტო ასამბლეის რიგით 63-ე წლიური სესია.

აღნიშნულ ღონისძიებაზე, რიგ საკითხებთან ერთად როგორიცაა ალიანსის წინაშე არსებული გამოწვევები და რუსეთთან ურთიერთობა, ასევე განიხილება შავი ზღვის რეგიონის უსაფრთხოების თემები.

საქართველოს პარლამენტის მუდმივმოქმედი დელეგაციას ნატო-ს საპარლამენტო ასამბლეაშიხელმძღვანელობს ირაკლი სესიაშვილი. ასევე დელეგაციაში შედიან ირაკლი ბერაია და სერგი კაპანაძე.

აქვე უნდა აღინიშნოს, რომ საქართველომ, მიმდინარე წლის მაისში უმასპინძლა ასამბლეის საგაზაფხულო სესიას, რაც, თავის მხრივ, ისტორიული მოვლენა იყო არამხოლოდ საქართველოსთვის, არამედ ასამბლეისთვისაც, რადგანაც საქართვლო გახდა ალიანსის რიგით 5-ე არაწევრი ქვეყანა, რომელმაც ასამბლეის სესიას მასპინძლობდა.

NATO-ს საპარლამენტო ასამბლეის 63-ე სესიას ალიანსის 29 წევრი და 23 პარტნიორი ქვეყნის დელეგატები მიიღებენ მონაწილეობას. პროგრამის მიხედვით, დღეს გაიმართება ასამბლეის თავმჯდომარის პაოლო ალისა და ორგანიზაციის გენერალური მდივნის დევიდ ჰობსის პრესკონფერენცია.

შაბათს და კვირას ასამბლეის წევრები კომიტეტებში იმუშავებენ, ხოლო ორშაბათს შედგება პლენარული სხდომა, რომელზეც სიტყვით NATO-ს გენერალური მდივანი იენს სტოლტენბერგიც გამოვა. ამავე დღეს საპარლამენტო ასამბლეა დაამტკიცებს რეზოლუციას.

ნატო-ს საპარლამენტო ასამბლეა ალიანსის წევრი ქვეყნების პარლამენტის წევრებს აერთიანებს. ორგანიზაციის მიზანი ალიანსისა და ევროატლანტიკური რეგიონის ქვეყნების მოქალაქეებს შორის კავშირის უზრუნველყოფაა.