ხელისუფლების ბრძოლა ეკლესიის წინააღმდეგ - ივანიშვილის უკანასკნელი კონკურენტი

პოლიტიკა - 18:14, 05 Oct, 2017

5342

ე.წ. ციანიდის საქმისა და საქართველოს საპატრიარქოს ირგვლივ მიმდინარე პროცესებს საქართველოს მართლმადიდებელი ეკლესიის წინააღმდეგ მიზანმიმართულ ბრძოლას უწოდებს დიპლომატი მამუკა გამყრელიძე, რომელიც მიიჩნევს, რომ ეს არის ბიძინა ივანიშვილის მცდელობა, ეკლესიის სახით ჩამოიშოროს უკანაკსნელი კონკურენტი და ,,საბოლოოს გაიმყაროს ერთპიროვნული მმართველის ტახტი“.

,,ნანუკას შოუ არ მინახავს. არც ვაპირებ, რადგან საპატრიარქოს თემა აღარ მაინტერესებს. ჩემი აზრი მყარად მაქვს ამ ყველაფერზე ჩამოყალიბებული.

ქვეყანაში მიმდინარეობს ბრძოლა ერთპიროვნული ხელისუფლებისათვის. ერთადერთი ინსტიტუცია, რომელსაც კიდევ შერჩა გავლენა ქვეყნის მოსახლეობაზე და არ ექვემდებარება ივანიშვილს არის საქართველოს მართლმადიდებლური ეკლესია. მთელი ეს ვაკხანალია ციანიდებით, ტერორისტებით, "გასაოცარი" ფაქტების "უეცარი" გამომჟღავნებით, მეორეხარისხოვანი პერსონაჟების დემონიზაციით და ა.შ. გახლავთ ერთი დიდი PR კამპანია მიმართული ეკლესიის დისკრედიტაციისა და მისი, მრევლზე გავლენის შესუსტებისკენ.

ვერ ვიტყვი, რომ ეს ცუდი იქნებოდა ნორმალური, დემოკრატიული ხელისუფლების პირობებში, რადგან საქართველო სეკულარული სახელმწიფოა და ეკლესია მის საქმეებში არ უნდა ერეოდეს, მითუმეტეს ეკლესია, რომელიც საკუთარი მრწამსის გამო რუსეთს მტრად ვერ მოიხსენიებს. სავალალო ის გახლავთ, რომ ეკლესიის დასუსტებით ივანიშვილი ჩამოიშორებს უკანასკნელ კონკურენტს და საბოლოოდ გაიმყარებს ერთპიროვნული მმართველის ტახტს.

ახლა თავად გადაწყვიტეთ რომელია უფრო დიდი ბოროტება“ - წერს მამუკა გამყრელიძე.