გახდება თუ არა რუსეთთან კერძო მოლაპარაკება დასჯადი და რას პასუხობს ,,პატრიოტთა ალიანსი" შალვა შავგულიძეს

პოლიტიკა - 16:59, 05 Oct, 2017

2842

რუსეთის ფედერაციაშ ვიზიტად მყოფი „საქართველოს პატრიოტთა ალიანსი“ საქართველოში დაბრუნდა, პარტიის წევრები მოსკოვში დუმის დეპუტატებს შეხვდნენ. ოპოზიციონერების განცხადებით, პარტიის ლიდერი, დავით თარხან-მოურავი შეხვედრებს რუსეთის მაღალჩინოსნების გარდა ასევე საოკუპაციო რეჟიმის წარმომადგენლებთან მართავდა.

„ჩვენ ახალი ინიციატივით შევალთ, რომ ვინც ხელს შეუშლის აფხაზეთს და ოსეთს დაბრუნებაში, ყველა გამოცხადდეს როგორც მოღალატე და ყველაზე სისხლის სამართლის საქმე იყოს აღძრული. ჩვენ დაბრუნებაზე ვსაუბრობთ, ჯოჯოხეთში, რომ იყოს ჩასასვლელი, უნდა ჩახვიდე.

,,რატომ არ ფიქრობთ, რომ შეხვედრები იყო აფხაზებთან და ოსებთან,“ - განაცხადა გიორგი ლომიამ, თუმცა, არ დააკონკრეტა ვის შეხვდნენ ოკუპირებული რეგიონების წარმომადგენლების მხრიდან.

პარლამენტის ფრაქცია ”საქართველოს პატრიოტების” წევრის, ადა მარშანიას განცხადებით, რუსეთის სახელმწიფო სათათბიროს დსთ-ის და ევრაზიული ინტეგრაციის საკითხების კომიტეტის თავმჯდომარის, კალაშნიკოვის გარდა შეხვედრა ფედერაციის საბჭოშიც გაიმართა.

„არანაირი მუქარა არ იყო არავისგან იქ წარმოთქმული და დაფიქსირებული. ჩვენ ვსაუბრობთ აბსოლუტურად კოლეგიალურად,“ - განაცხადა ადა მარშანიამ.

,,პატრიოტთა ალიანსის" წევრებს თბილისის საერთაშორისო აეროპორტში აქციით დახვდნენ ,,თავისუფალი დემოკრატების" წევრები.

“თავისუფალი დემოკრატების” ახალი ინივიატივა - რუსეთის ხელისუფლებასთან კერძო ინიციატივით მოლაპარაკებების წარმოება სისხლის სამართლებრივი წესით დასჯადი გახდეს, პარტიამ ამ ინიციატივის შესახებ მიმდინარე წლის ზაფხულში გააჟღერა ინფორმაცია, „თავისუფალი დემოკრატების“ ინიციატივას პარლამენტში საშემოგდომო სესიაზე დაარეგისტრირებენ და ამაში დახმარებას პროდასავლურ პარტიებს სთხოვენ. სწორედ ამ ინიციატივის საპასუხოდ გააკეთეს „პატრიოტთა ალიანსის“ წევრებმა დღეს განცხადებები, რასაც შალვა შავგულიძემ უპასუხა:

"მათ შეეცადონ ჩვენი ინიციატივა გახადონ დასჯადი და ჩვენ საშემოდგომო სესიაზე წარვადგენთ იმ კანონპროექტს, როგორც ეს განვაცხადეთ, რომ ოკუპანტ ქვეყანასთან და საქართველოსთან საომარ მოქმედებებში მყოფ ქვეყნის ხელისუფლებებთან ოფიციალური კომუნიკაციის უფლება მხოლოდ საქართველოს ხელისუფლებას უნდა ჰქონდეს. ეს არის საერთაშორისო სტანდარტი. სამწუხაროდ, ჩვენი კანონმდებლობა ამას დღემდე არ ითვალისწინებდა სისხლის სამართლებრივი აკრძალვის სახით. ვინაიდან ეს პრობლემა ასე აქტუალურად არ იდგა, არ მიდიოდა ქართული პოლიტიკური პარტიები თუ სხვა ორგანიზაციები და ოკუპანტ ქვეყანასთან რაღაც სქემებს არ ათანხმებდა და მერე არ ცდილობდა იქ შეთანხმებული სქემები ჩვენი ქვეყნისთვის თავს მოეხვია. რადგან დადგა ეს საჭიროება, კანონითაც უნდა დარეგულირდეს"- განაცხადა შალვა შავგულიძემ.