მერობის დამოუკიდებელი კანდიდატი კახა კალაძეს დებატებს კიდევ ერთხელ სთავაზობს. ამჯერად ალეკო ელისაშვილმა ვიდეო მიმართვა გაავრცელა. ელისაშვილის თქმით, ის კახა კალაძის, როგორც ფეხბურთელის გულშემატკივარი იყო მუდამ და საქართველოს ისტორიაში ერთ-ერთ საუკეთესო სპორტსმენად მიაჩნია. ელისაშვილის თქმით, მას კალაძესთან როგორც სპორტსმენთან შეჯიბრების ამბიცია არასოდეს გაუჩნდებოდა , თუმცა რადგან კალაძეს თბილისის მერობა სურს, მაშინ თბილისის პრობლემებზე სასაუბროდ მისი გამოწვევაც უნდა მიიღოს:

„კახა კალაძეს რომ ჩემთვის ფეხბურთში შეჯიბრი შემოეთავაზებინა, მე რა თქმა უნდა უარს ვეტყოდი, ერთი წამითაც არ დავუშვებდი, რომ შეიძლებოდა მას სტადიონზე შევჯიბრებოდი, მაგრამ მე ფეხბურთელობას არ ვაპირებ და კახი აპირებს თბილისის მერობას. მიუხედავად იმისა, რომ ასეთი მასშტაბური კამპანია აქვს, მე ასეთი ფული არ მაქვს, არც მილიარდერი მეგობარი მყავს და არც ადმინისტრაციული რესურსი მაქვს, ამის მიუხედავად დემოკრატიას აქვს ძალიან მნიშვნელოვანი პრინციპი, რომ მერობის კანდიდატები ტელედებატებში შეხვდნენ ერთმანეთს და დაამტკიცონ თავისი პოზიციის მართებულობა, ჰოდა გიწვევ დებატებში, დავჯდეთ, თბილისზე ვიდებატოთ და მერე პირობას გაძლევ, რომ აირჩიე სტადიონი და ნებისმიერ სტადიონზე ფეხბურთში შეგეჯიბრები“- აცხადებს ალეკო ელისაშვილი.