"უკრაინის ხელისუფლებას ვურჩევ სააკაშვილი სამხრეთ ოსეთს გადასცეს"- ანატოლი ბიბილოვი

პოლიტიკა - 13:17, 04 Oct, 2017

10143

ოკუპირებული ცხინვალის რეგიონის დე ფაქტო პრეზიდენტი ანატოლი ბიბილოვის თქმით, თუ უკრაინას სურს რომ სამხრეთ ოსეთის წინაშე ჩადენილი დანაშაულის ტვირთი მოიხსნას მიხეილ სააკაშვილი არა საქართველოს, არამედ სამხრეთ ოსეთის ხელისუფლებას უნდა გადასცეს:

„მიხეილ სააკაშვილი იმ პირთა სიაში იმყოფება, რომლებმაც ომის დანაშაული ჩაიდინეს. ეს სია სამხრეთ ოსეთის მთავარმა პროკურატურამ საერთაშორისო ძებნის გამოსაცხადებლად რუს კოლეგებს გადასცა.

მე კიევის ხელისუფლებას ვურჩევდი, რომ სააკაშვილი სამხრეთ ოსეთისთვის გადმოეცა. იმისთვის რომ მან სასამართლოს წინაშე პასუხი კაცობრიობის წინააღმდეგ ჩადენილი დანაშაულის გამო აგოს.

ამ შემთხვევაში უკრაინის ხელისუფლება მოიქცეოდა ღირსეულად და ნაწილობრივ მაინც მოიხსნიდა პასუხისმგებლობის იმ ტვირთს, რომელიც მათ საქართველოს იარაღით მომარაგების გამო აკისრიათ, რა იარაღიც საქართველომ სამხრეთ ოსეთის მშვიდობიანი მოსახლეობის წინააღმდეგ გამოიყენა.“- განაცხადა ანატოლი ბიბილოვმა.

საოკუპაციო რეჟიმის წარმომადგენლის თქმით უკრაინა არა მხოლოდ იარაღით ამარაგებდა საქართველოს, არამედ უკრაინელი მოხალისეები ცხინვალის რეგიონში მიმდინარე ომშიც აქტიურად მონაწილეობდნენ და საქართველოს მხარეს იბრძოდნენ. ბიბილოვის თქმით ეს ფაქტი დადასტურებულია მასალებით , რომელიც სამხრეთ ოსეთმა 2008 წლის ომის გამოძიების ფარგლებში მოიპოვა.