"პატრიოტთა ალიანსის" მოსკოვში ვიზიტს ოპოზიცია ხელისუფლებასთან შეთანხმებულს უწოდებს

პოლიტიკა - 13:05, 04 Oct, 2017

946

წელს, უკვე მეორედ, რუსეთის სახელმწიფო დუმაში, "პატრიოტთა ალიანსისა" და რუსი დეპუტატების შეხვედრა გაიმართა. დეპუტატების ვიზიტს ოპოზიცია აკრიტიკებს და ხელისუფლებასთან შეთანხმებულს უწოდებს.

როგორც „ერთიანი ნაციონალური მოძრაობის“ წევრი გიორგი ბარამიძე აცხადებს, საქართველო მათი სახით, პრაქტიკულად მარტო ესაუბრება რუსეთს.

„ეს ორგანიზაცია „ქართული ოცნების“ მხარდაჭერით ცდილობს, რომ დაგვაბრუნოს იმ ვითარებაში, როდესაც საქართველო მარტო ესაუბრება პრაქტიკულად რუსეთს“- აღნიშნა ბარამიძემ.

„ევროპული საქართველოს“ წევრი სერგო რატიანი დეპუტატების შევედრასთან დაკავშირებით ხელისუფლებისგან ადეკვატურ რეაგირებას ელის.

„დამაზიანებელია როდესაც ოკუპანტ ქვეყანას ელაპარაკება პარლამენტში მყოფი ერთ-ერთ ოპოზიციური ძალა და ეს ბუნებრივია არის გარკვეულწილად შეთანხმებული ხელისუფლებასთან. ჩვენ ვხედავთ და იყო სურვილი ბიძინა ივანიშვილისა, რომ სწორედ ასეთი პოლიტიკური ძალა ყოფილიყო პარლამენტში“-განაცხადა რატიანმა.

"პატრიოტთა ალიანსის" წევრები ადა მარშანია, გიორგი ლომია და ნატო ჩხეიძე მოსკოვში 2 ოქტომბერს გაემგზავრნენ. ისინი რუსეთთან პირდაპირი დიალოგის დაწყებასა და ახალი - საქართველო-ნატო- რუსეთის ფორმატის ამოქმედებას ითხოვს.