კოლაბორაციონიზმის მცდელობა საქართველოს სახელმწიფოს დასასუსტებლად - ექსპერტების თქმით „პატრიოტთა ალიანსის“ რუსეთში ვიზიტი მოსკოვის უშუალო დავალებაა

პოლიტიკა - 10:28, 04 Oct, 2017

1399

ანალიტიკოსების შეფასებით, „პატრიოტთა ალიანსის“ რუსეთში ვიზიტი, მოსკოვის უშუალო დავალებაა.

მათი შეფასებით, რუს დეპუტატებთან გამართულ შეხვედრებზე წამოჭრილი საკითხები, ქვეყნის ინტერესებს ეწინააღმდეგება.

„ნებისმიერი ფორმის თანამშრომლობა რუსეთთან, იქნება ეს ეკონომიკური, პოლიტიკური, კულტურა, სპორტი, ყველაფერი არის რუსული ჰიბრიდული ომის ნაწილი. ყველაფერი არის პოლიტიკა და აქედან გამომდინარე, ერთადერთი შეფასება არის კოლაბორაციონიზმის მცდელობა იმისთვის, რომ დაასუსტონ საქართველოს სახელმწიფო,“-აცხადებს ბათუ ქუთელია.

ექსპერტების შეფასებით, შექმნილ ვითარებაში აუცილებელია საქართველოს ხელისუფლებამ რუსეთთან მიმართებით მკვეთრი პოზიცია დააფიქსიროს. საუბარია ოკუპირებულ აფხაზეთში რკინიგზის აღდგენასა და საქართველოში საერთაშორისო ფორუმზე რუსი დეპუტატების დასწრებაზე.

„ის რაც ახლა მოსკოვში, კრემლში და ლუბლიანკაზე საუბრის დროს შეიძლება ლოგიკურად ჟღერდეს, ქართული მოსახლეობისთვის ნონსენსია, შესაბამისად პატრიოტთა ალიანსმაც ვერ შეძლო ამ თემების კარგად შემოტანა ჩვენს რეალობაში. რა დავალებაც მიიღეს, გაიმეორეს იგივე, მაგრამ ისევ და ისევ მეთოდურად სუსტად გააკეთეს ეს და ამიტომ იუმორისტული და ცინიკური მიდგომების მსხვერპლი გახდნენ,“-განაცხადა ნოდარ ხარშილაძემ.