"ლგბტ თემის წარმომადგენლების სია შორენა თეთრუაშვილსა და სუს-ს მივაწოდე"- "მაცაცოს"სკანდალური ინტერვიუ

პოლიტიკა - 13:20, 03 Oct, 2017

13876

ლგბტ თემის წარმომადგენელმა გიორგი ჩხარტიშვილმა („მაცაცო“) საქართველო დატოვა. როგორც ჩხარტიშვილი „ქრონიკა+“-სთან ინტერვიუში აცხადებს, ამის მიზეზი სახელმწიფოს მხრიდან მასზე განხორციელებული ზეწოლა გახდა. მისი თქმით, ის სახელმწიფო უსაფრთხოების სამსახურმა აიძულა მათი აგენტი გამხდარიყო და მათ სასარგებლოდ გადაებირებინა ლგბტ თემის წარმომადგენლები, მოეპოვებინა ლგბტ თემის წარმომადგენელ პოლიტიკოსებზე, პარლამენტარებზე და საჯარო ფიგურებზე ინფორმაცია. ჩხარტიშვილის განცხადებით სუს-ის წარმომადგენელს ის 2015 წელს შეხვდა, მას პირობა წაუყენეს ან მათთან ითანამშრომლებდა ან მას დიდი ხნით დაიჭერდნენ.

„მაიძულეს ხელი მომეწერა შეთანხმებაზე, მომანიჭეს აგენტურული სახელი „ფანტომი“. მაიძულებდნენ , მათ სასარგებლოდ გადამებირებინა ლგბტ თემის აქტივისტები, ის ადამიანები, რომლებიც ამ თემაზე მუშაობდნენ და ინფორმაცია ჰქონდათ გარკვეულ საკითხებზე.“-განაცხადა ჩხარტიშვილმა. მისი თქმით მას სთხოვდნენ ხელისუფლების სხვადასხვა შტოში მომუშავე ლგბტ თემის წარმომადგენლების სიას, მათ გადაღებას და ჩაწერას:

„მთხოვდნენ არა მარტო გადაღებას და ჩაწერას, არამედ მათზე ინფორმაციისა და სახელობითი სიის მიწოდებას. ასეთი სია შორენა თეთრუაშვილსა და სუს-ის სააგენტოს წარმომადგენლებსაც მივაწოდე. შორენა ასევე მთხოვდა არატრადიციული ორიენტაციის პოლიტიკოსებისა და პარლამენტარების, საჯარო ფიგურების მონაცემებს. იძულებითი ფორმით მივაწოდე მხოლოდ პარლამენტარებისა და გამგეობებში მომუშავე საჯარო მოხელეების შესახებ. მათ შორის მივაწოდე ინფორმაცია (ასახელებს კონკრეტულ თანამდებობის პირს), რომელსაც დაჟინებით ითხოვდნენ ჩემგან. ასევე სასჯელაღსრულების სამინისტროს ბადრაგირების სამსახურის ერთ-ერთი თანამშრომლის მონაცემებს ითხოვდნენ... რაც შეეხება სახელობით სიას, ამის გარდა ჩემგან ითხოვდნენ ვიდეომასალას. სასულიერო პირებზე სუს-ს ჩემგან ინფორმაცია არასოდეს მოუთხოვია, მაგრამ უშუალოდ ჩემგან რა თქმა უნდა , შორენა თეთრუაშვილი გარკვეულ პირებთან დაკავშირებით ინფორმაციას ითხოვდა“- განაცხადა გიორგი ჩხარტიშვილმა.