"ფასების ზრდა ბიუჯეტის ფლანგვის შედეგია"- ზურაბ ჭიაბერაშვილი

პოლიტიკა - 12:27, 03 Oct, 2017

886

“ევროპული საქართველოს” წევრმა, ზურაბ ჭიაბერაშვილმა დღევანდელ ბრიფინგზე საქსტატის მიერ გამოქვეყნებულ მაჩვენებლები შეაფასა და აღნიშნა, რომ ფასების ზრდა ხელისუფლების მიერ ბიუჯეტის ფლანგვის შედეგია.

როგორც ჭიაბერაშვილმა განაცხადა, ფასები იზრდება, “ქართული ოცნება” კი აგრძელებს ბიუჯეტის დატაცებასა და ამ საყოველთაო გაჭირვებაში ხალხის ხარჯზე საკუთარი კეთილდღეობის მოწყობას.

"ფასების საგრძნობი ზრდა ფიქსირდება პრაქტიკულად ყველაფერზე, რასაც სასურსათო მაღაზიაში ჩვენი მოქალაქეები ყიდულობენ. ფასების საგრძნობი ზრდაა მედიკამენტებზე და, ზოგადად, ჯანმრთელობის დაცვის სფეროში - 7.7%. განსაკუთრებით დიდია ფასების წლიური ზრდა ტრანსპორტის ჯგუფში - 14.7%, რაც “ქართული ოცნების” მიერ საწვავზე აქციზის მატების პირდაპირი შედეგია და რაც ჯაჭვურად გადაეცა საკვებ პროდუქტებსაც.

გაზის ტარიფის 11-12-13-თეთრიანი (ზოგგან 16-16 თეთრითაც კი) გაზრდა საქართველოს ქალაქებისა და რაიონების დიდ ნაწილში კიდევ უფრო გაუძვირებს ცხოვრებას ჩვენი მოქალაქეების უმრავლესობას. მათ მეტი საფასურის გადახდა მოუწევთ არა მხოლოდ ბუნებრივ აირში, არამედ გაძვირებულ პროდუქტშიც, რადგან გაზის ტარიფის ზრდა დამატებითი ბიძგია ინფლაციისთვის.

2018 წლის ბიუჯეტის პროექტი, რაც “ქართულმა ოცნებამ” პარლამენტში წარმოადგინა, ავლენს 3 რამეს:

ხელისუფლება ვერ გრძნობს ფასების ზრდას, ხალხის გაჭირვებას და არ ზრდის პენსიას და სოციალურ დახმარებებს

ხელისუფლება არ ამცირებს გადასახადებს, რათა კვლავ გააგრძელოს ხალხის ჯიბიდან მეტი ფულის ამოღება და პრემია-დანამატებით საკუთარი ცხოვრების მოწყობა

ხელისუფლება ბიუჯეტს ზრდის არა ეკონომიკის ზრდის ხარჯზე, არამედ ვალების აღებით, რაც ისევ ხალხის გადასახდელია

“გამოსავალია “ევროპული საქართველოს” მცირე და საშუალო ბიზნესის მხარდაჭერის პროგრამა, რომელიც გადასახადების შემცირების გზით ეკონომიკური ზრდის დაჩქარებაზე, უმუშევრობის შემცირებაზე, ფასების დასტაბილურებასა და მოქალაქეთა შემოსავლების ზრდაზეა ორიენტირებული”, - განაცხადა ზურაბ ჭიაბერაშვილმა.