საქართველოს სახელმწიფო აუდიტის სამსახურის ხელმძღვანელმა მოადგილეები წარადგინა, ირაკლი მექვაბიშვილის მოადგილეებად დაინიშნენ ეკატერინე ღაძაძე, დავით გოგიჩაიშვილი, ასევე პოსტი შეინარჩუნა ნოდარ ჯავახიშვილმა, რომელიც ამ თანამდებობას წინა გენერალური აუდიტორის დროსაც იკავებდა. მექვაბიშვილის თქმით ხელი არ მოუწერია არავის გათავისუფლებაზე, რადგან კანონით მოადგილეები უფლებამოსილებას კარგავენ ახალი გენერალური აუდიტორის წარდგინების დროს:

„კანონით მოადგილეები უფლებამოსილებას კარგავენ გენერალური აუდიტორის წარდგინების დროს. მთავარ აუდიტორს ხელი არ მოუწერია არავის გათავისუფლებაზე, ხელი მოვაწერე ახალი კადრების წარდგინებას. წარვადგინეთ სამი მოადგილე, რომლებიც შეირჩნენ პროფესიონალიზმის ნიშნით. ეკატერინე ღაძაძე, დავით გოგიჩაიშვილი, ნოდარ ჯავახიშვილი.“-განაცხადა ირაკლი მექვაბიშვილმა.

მექვაბიშვილი მზადაა შეხვდეს ყველა იმ არასამთავრობო ორგანიზაციას, რომელსაც სახელმწიფო აუდიტის სამსახურის საკადრო ცვლილებებთან დაკავშირებით შეკითხვები აქვს. ამასთანავე მექვაბიშვილმა უარყო ინფორმაცია, რომ საკადრო ცვლილებები იუსტიციის მინისტრთან იყო შეთანხმებული და განაცხადა, რომ თეა წულუკიანთან შეხვედრის თემა მომავალი თანამშრომლობის საკითხები იყო.

შეგახსენებთ, სახელმწიფო აუდიტის სამსახურის ხელმძღვანელის მოადგილის პოსტი ვერ შეინარჩუნა ნინო ლომჯარიამ, რომელიც ირაკლი მექვაბიშვილის დანიშვნამდე გენერალური აუდიტორის მოვალეობას ასრულებდა.