"ნაციონალური მოძრაობა" დედაქალაქის მერს საკრებულოს მიერ პარასკევს მიღებული გადაწყვეტილების 21 ოქტომბრამდე შეჩერებისთვის ნახევარ საათს აძლევს.

როგორც ზაალ უდუმაშვილმა განაცხადა, უკანონო გადაწყვეტილების აღსრულების საშუალებას არ მისცემენ.

აქციის მონაწილეებმა მერიის მიმდებარედ, შარტავას ქუჩა გადაკეტეს. ისინი დავით ნარმანიასთან შეხვედრას ითხოვენ.

"ჩვენ აქ მხოლოდ ერთი მიზნით შევიკრიბეთ, არ მივცეთ საშუალება თბილისის მერიას ის უკანონო გადაწყვეტილება აღასრულოს, რომელიც თბილისის საკრებულოს სამარცხვინო უმრავლესობამ სამარცხვინო ვითარებაში მიიღო. ეს გადაწყვეტილება პოლიციის, სუს-ის და ზონდერების გადაწყვეტილებით მიიღეს. ერთი სული ჰქონდათ, რომ თავისი ბატონისთვის ეპატაკებინათ, რომ მისი სურვილი აღსრულებულია. ვერც ერთმა დეპუტატმა ვერ შეძლო ხმის ამოღება და წინააღმდეგობის გაწევა. მონურად ემორჩილებიან თავის ბატონს. იმ დღეს თბილისელებს თავს ლაფი დაგვასხეს, მაგრამ არავის ეგონოს, რომ ამას თბილისი მოითმენს და ასეთ უკანონობას შეეგუება. ბიძინა ივანიშვილს მხოლოდ ლარის გადახდა სურს თბილისის ცენტრში არსებულ ქონებაში და პუშკინის სკვერში არსებული მართლაც ისტორიული ტერიტორია ასე უნდა მიითვისოს. ასევე 40 ჰექტარს მიუერთოს დამატებითი ტერიტორია თაბორის მთაზე", - აღნიშნა უდუმაშვილმა. ​