"საქართველო არ არის თქვენი ბოსტანი“ - "ევროპული საქართველოს" აქცია პუშკინის სკვერში

პოლიტიკა - 19:09, 01 Oct, 2017

1479

„ევროპულმა საქართველომ“ პუშკინის სკვერში აქცია გამართა, რომელზეც საკრებულოს მიერ მიღებული გადაწყვეტილება თაბორის მთისა და პუშკინის ქუჩის ნაწილისთვის ზონის სტატუსის შეცვლა და მათი ბიძინა ივანიშვილის კომპანიისათვის გადაცემა გააპროტესტა.

„არ არსებობს ასეთი სითავხედე ვინმეს შერჩეს. არც თბილისია ის ქალაქი, რომელიც ასეთ სითავხედეს ვინმეს შეარჩენს, არც საქართველოა ის ქვეყანა, რომელიც ასეთ სითავხედეს ვინმეს შეარჩენს. არ გამოვა, რომ აი ასე ადამიანებისთვის თვალებში ნაცრის შეყრით, ამ ადამიანებმა კიდევ ერთხელ მიაღწიონ გამარჯვებას. რომ მილიარდელმა ქალაქს მოსტაცოს, მოპაროს მიწა ბოტანიკური ბაღის და შეუერთოს თავის ეზოს. არ გამოვა, რომ გამოწკეპილი კალაძე ფოტოშოპში გადაღებული ვითომ მწვანე ნარგავებით, ვითომ გალამაზებული თბილისით იწონებდეს თავს. დღეს ვაჟბატონებს, „ქართულ ოცნებას“ თავისი ახალი ვიდეორგოლის პრეზენტაცია ჰქონდათ „ჩემი საქართველო აქ არის“. ყველას საქართველო აქ არის მაგრამ საქართველო არ არის თქვენი ბოსტანი“,-განაცხადა გოკა გაბაშვილმა.

მხარდამჭერებს სიტყვით „ევროპული საქართველოს“ მერობის კანდიდატმაც მიმართა. ელენე ხოშტარიას განცხადებით არ უნდა განმეორდეს ქვეყანაში ის, რაც წლების წინ ხდებოდა და თბილისელებმა არ უნდა დაუშვან, რომ 1 ლარად მილიარდელებმა მიიტაცონ დედაქალაქის ქონება.