„ერთიანი ნაციონალური მოძრაობა“ ორშაბათს 14:00 საათზე, თბილისის მერიასთან აქციას გამართავს. ამის შესახებ ენმ-ის თბილისის მერობის კანდიდატმა ზაალ უდუმაშვილმა დღეს გამართულ საგანგებო ბრიფინგზე განაცხადა:

“იმ მომენტიდან, როდესაც ჩვენ გავაკეთეთ განაცხადი, რომ მონაწილეობას ვიღებდით თვითმმართველობის არჩევნებში, გადავწყვიტეთ, რომ ბოლომდე დაგვეცვა თბილისელების ინტერესები და ეს არ არის წინასაარჩევნო რიტორიკა, ეს არის ჩვენი ცხოვრების საქმე. დღეს ჩვენ აქ შევიკრიბეთ იმიტომ, რომ მკაფიოდ ვუთხრათ „ქართული ოცნებას“ და მის უკან მდგარ ბიძინა ივანიშვილს, რომ არ დავუთმობთ ბოტანიკურ ბაღს. ჩვენ არ შევეგუებით იმას, რომ ერთ ლარად გადაეცეს ბიძინა ივანიშვილს ნახევარი თბილისი და არ შევარჩენთ, რომ მისი „პანორამა თბილისი“ ამახინჯებდეს თბილისის ისტორიულ ნაწილს.

ჩვენ არ ვაპირებთ ფარ-ხმლის დაყრას არჩევნებამდე, არჩევნებში გამარჯვების შემდეგ ბუნებრივია ყველა ის უკანონო გადაწყვეტილება გაბათილდება, რომელიც თბილისის წინააღმდეგ იყო მიმართული. ჩვენი პროტესტი იქნება უფრო მრავალრიცხოვანი, უფრო ძლიერი და უფრო ხმამაღალი, ამიტომ ჩვენ დღეს ვაანონსებთ აქციას, ორშაბათს ორ საათზე თბილისის მერიასთან, ვიწვევთ ყველას, ვინც გვიჭერს მხარს, ვინც არა მხოლოდ ჩვენ გვიჭერს მხარს, არამედ უჭერს თბილისს, ჩვენს საერთო სახლს, ჩვენ ვეუბნებით არას თბილისში გამეფებულ უკანონობას და ჩვენ ვეუბნებით არას ბიძინა ივანიშვილის თავგასულობას. გელოდებით ყველას თბილისის მერიასთან ორშაბათს, ორ საათზე“, - განაცხადა ზაალ უდუაშვილმა.