საკრებულოს სხდომაზე თაბორის მთის ზონის სტატუსის ცვლილების საკითხის განხილვას ხმაური მოჰყვა, სხდომას "ნაციონალური მოძრაობის" თბილისის მერობის კანდიდატი ზაალ უდუმაშვილიც ესწრებოდა, მისი თქმით ბიძინა ივანიშვილს თაბორის მთაზე დაკანონებული აქვს 40 ჰექტარი და საკრებულო მას კიდევ ახალ ტერიტორიებს აძლევს.

ზაალ უდუმაშვილმა საკრებულოს თავმჯდომარეს გიორგი ალიბეგაშვილს მიმართა, აღნიშნული საკითხი სხდომაზე არ განხილულიყო:

“ძალიან მნიშვნელოვანი საკითხი განიხილება ორი კომისიის სხდომაზე, რომელიც ეხება თაბორის მიწის კიდევ ერთი ნაკვეთის გადაცემას ბიძინა ივანიშვილისთვის და ასევე პუშკინის სკვერის საჯარო ავტოსადგომის გადაცემას სიმბოლურად, ერთ ლარად გადაცემას ბიძინა ივანიშცილისთვის, ჩემი მოწოდება იქნება, რომ იქნებ დღის წესრიგში არ შევიდეს ეს საკითხი დღეს და თბილისელების კიდევ ერთი ტერიტორია არ დაიკარგოს, როგორც ქალაქის ცენტრში, ასევე რეკრიაციული ზონის სტატუსი არ შეეცვალოს, როგორც საკრებულოს თავმჯდომარესთან მექნება მოწოდება და მოთხოვნა, რომ რამენაირად გავლენა იქონიოთ, რათა დღეს საკრებულომ არ განიხილოს ეს საკითხი.

გიორგი ალიბეგაშვილმა ამის საპასუხოდ განაცხადა, რომ ასეთი საკიტხები განიხილება სხდომებზე და მიმდინარეობს მსჯელობა, ამის შემდეგ კი საკრებულო შესაბამისად მოიქცევა.

უდუმაშვილის განცხადებით, ორივე საკითხში ბიძინა ივანიშვილის ინტერესები იკვეთება, რასაც ალიბეგაშვილმა უპასუხა: „მე მოვერიდებოდი ამ სახელების დასახელებას“

მიუხედავად „ნაციონალური მოძრაობის“მერობის კანდიდატის მოთხოვნისა, საკრებულოს სხდომაზე საკითხები მაინც განიხილება.