"სებ-ის ყოფილი შენობის ეზოში "პანორამა-თბილისის" საბაგირო გზის ერთ-ერთი საყრდენი ბოძი დგება"- "ტფილისის ჰამქარი"

პოლიტიკა - 13:49, 29 Sep, 2017

1843

„ტფილისის ჰამქრის“ განცხადებით "პანორამა-თბილისის" საბაგირო გზის ერთ-ერთი საყრდენი ბოძის დადგმა ეროვნული ბანკის ყოფილი შენობის ეზოში იგეგმება. აღნიშნულთან დაკავშირებით "ტფილისის ჰამქარი" განცხადებას ავრცელებს და აღნიშნავს, რომ პანორამა თბილისი არის ინვესტიცია, რომელიც კლავს ისტორიულ ქალაქს:

„ლეონიძის ქ. #3-ში, ეროვნული ბანკის ყოფილი შენობის ეზოში "პანორამა-თბილისის" საბაგირო გზის ერთ-ერთი საყრდენი ბოძი დგება!!!

შენობა კულტურული მემკვიდრეობის ძეგლის სტატუსის მატარებელია, აშენებულია 1911-13 წლებში, არქიტექტორ მიხეილ ოჰანჯანოვის მიერ.

ხელნაწერთა ეროვნულ ცენტრს არქიტექტურის სამსახურმა რამდენჯერმე დაუწუნა ფასადზე საინფორმაციო აბრის განთავსების პროექტი, იმ მოტივით, რომ აბრა არ შეესაბამებოდა ძეგლის იერსახეს.

საინტერესოა, რამდენად თავსებადია საბაგიროს საკმაოდ მასშტაბური და მძიმე კონსტრუქციის განთავსება (რომლისთვისაც საჭიროა ძალიან ღრმა ფუნდამენტის მოწყობა), ძეგლის ინტერესებთან?!

ასევე, შეგახსენებთ, რომ ჩვენს მიერ დასმულ კითხვაზე სად განთავსდებოდა საბაგიროს სვეტები, "პანორამა თბილისის" პროექტის ავტორები გვპასუხობდნენ, რომ უნიკალური ტექნოლოგიის გამოყენებით, ცეკავშირის შენობის ადგილიდან სოლოლაკის ქედამდე ბაგირი საყრდენი სვეტების გარეშე გაიჭიმებოდა!

პანორამა თბილისი არის ინვესტიცია, რომელიც კლავს ისტორიულ ქალაქს!“- აღნიშნულია თბილისის ჰამქრის განცხადებაში.