პუტინის მეგობარ დირიჟორ გერგიევს "საქართველოში, აფხაზეთსა და სამხრეთ ოსეთში" შემოქმედებითი პროექტის დაწყება სურს

პოლიტიკა - 15:34, 28 Sep, 2017

9260

დირიჟორი ვალერი გერგიევი კავკასიაში კულტურული ურთიერთობების დალაგებას აპირებს. სანკტ-პეტერბურგის მარიინსკის თეატრის სამხატვრო ხელმძღვანელმა ამის შესახებ ვლადიკავკაზში გამართულ პრესკონფერენციაზე განაცხადა. მისი თქმით, ის შემოქმედებითი პროექტების განხორციელებას მთელ კავკასიაში გეგმავს. კავკასიის ქვეყნების ჩამოთვლისას პუტინის მეგობარმა დირიჟორმა საქართველო და მისი ოკუპირებული რეგიონები ცალ-ცალკე დამოუკიდებელ ქვეყნებად მოიხსენია:

„ახლა საუბარი მიდის იმაზე, რომ კავკასიის მთელმა რეგიონმა ძველი კავშირები აღადგინოს. ამიტომ სომხეთი, საქართველო, აზერბაიჯანი, სამხრეთ ოსეთი, აფხაზეთი, ჩრდილოეთ კავკასიის ყველა რესპუბლიკა, როსტოვის ოლქი, კრასნოდარის მხარე, კალმიკია და დიდი ქალაქები, როგორიცაა სოჭი და კრასნოდარი - ყველა შედის ამ შემოქმედებითი პროექტის გეგმაში. ჩვენ ნაკლებად გვაინტერესებს კონიუნქტურა - ვისთან კარგი ურთიერთობაა და ვისთან უარესი. დიდი კავკასიის შვილებს შეეძლებათ ერთად გამოვიდნენ ერთ სცენაზე, მნიშვნელობა არ აქვს ეს ვლადიკავკაზში მოხდება, ბათუმში, ბაქოში თუ ერევანში. საჭიროა გადაილახოს ის მწვავე წინაღობები, რომლებიც ბოლო 15 - 25 წლის განმავლობაში წარმოიშვა და მუსიკოსებზე უკეთ ამას ვინ შეძლებს.“- განაცხადა გერგიევმა. მისი თქმით მარიინსკის თეატრის კონცერტები ჩატარდება აზერბაიჯანში, სომხეთში და საქართველოში, ასევე ამ ქვეყნიდან მუსიკოსები მიწვეული იქნებიან სანკტ პეტერბურგშიც..

„ჩემს გეგმებშია - დავბრუნდე ბაქოშიც, ერევანშიც და თბილისშიც. საქართველო ყველაზე რთულია, ბუნებრივი მიზეზების გამო, მაგრამ მე ვაძლიერებ კავშირებს იქაურ კოლეგებთან, ჩვენ ამ საქმეში სრულიად აპოლიტიკურები ვართ. ჩემ გეგმაში ნამდვილად შედის შესანიშნავი ქართველი პიანისტი ბავშვების სცენაზე გამოყვანა. ჩვენ მთელ ჩვენს ძალისხმევას გამოვიყენებთ მოსაწვევად, ავანაზღაურებთ მგზავრობას. მე ვფიქრობ რომ რეგიონები თავის მხრივ მოისურვებენ ასეთ თანამშრომლობას“- განაცხადა გერგიევმა.

შეგახსნებთ, ვალერი გერგიევი პუტინის პოლიტიკის აქტიური მხარდამჭერია, მან კონცერტი ოკუპირებულ ცხინვალში ომის დასრულებიდან რამდენიმე დღეში, 2008 წლის 22 აგვისტოს გამართა. გერგიევი მხარს უჭერს პუტინის პოლიტიკას აღმოსავლეთ უკრაინაშიც.