პრეზიდენტის ადმინისტრაციაში 16:00 საათზე პოლიტიკურ პარტიებს ელოდებიან. გიორგი მარგველაშვილთან საკონსტიტუციო ცვლილებებთან დაკავშირებულ კონსულტაციებში მონაწილეობის მისაღებად მიწვეულია ყველა პოლიტიკური პარტია, მათ შორის საპარლამენტო უმრავლესობაც.

მმართველი გუნდი პრეზიდენტს განსხვავებულ ფორმატში ცალკე შეხვედრას სთავაზობს. აღნიშნულ საკითხზე კომუნიკაცია საქართველოს პარლამენტის თავმჯდომარესა და პრეზიდენტს შორის უკვე შედგა. თუმცა, შეიცვლება თუ არა ფორმატი ჯერჯერობით უცნობია.

პრეზიდენტთან შესახვედრად ემზადება საპარლამენტო და არასაპარლამენტო ოპოზიცია. საპარლამენტო ოპოზიციის წარმომადგენლები მიიჩნევენ, რომ პრეზიდენტმა ვეტო უნდა დაადოს საარჩევნო სისტემისა და პრეზიდენტის პირდაპირი წესით არჩევის საკითხებს.

„მთელი რიგი საკითხები, რაც შეეხება პრეზიდენტის არჩევის წესს, რაც შეეხება პარლამენტის არჩევის წესს, ფაქტობრივად ქმნის ჩიხს ქვეყნის დემოკრატიული განვითარებისათვის, რეალურად ქმნის წინაპირობას პოლიტიკური კრიზისისათვის. ამ ვითარებაში, საქართველოს პრეზიდენტს აქვს მნიშვნელოვანი მისია, რომ გამოიყენოს კონსტიტუციით მისთვის მინიჭებული ყველა უფლება, იმისათვის, რომ შეაჩეროს ეს პროცესი“, - აცხადებს „ერთიანი ნაციონალური მოძრაობის“ წევრი სალომე სამადაშვილი.