მმართველმა გუნდმა მიწის გაყიდვის შეზღუდვის ჩანაწერი მე-3 მოსმენის წინ შეცვალა?- "მიხვდნენ, რომ დიდ სისულელეს სჩადიოდნენ"

პოლიტიკა - 13:39, 27 Sep, 2017

1323

„ერთიანი ნაციონალური მოძრაობის“ წევრის რომან გოცირიძის თქმით პარლამენტმა გუშინ კონსტიტუციის მიღებისას უკანონობა ჩაიდინა, რადგან ნაცვლად რედაქციული ხასიათის ცვლილებისა, კანონპროექტში არსებითი ხასიათის ცვლილება შეიტანა. დეპუტატის თქმით ორი მოსმენით მიღებულ კანონპროექტში მიწის გაყიდვის შეზღუდვასთან დაკავშირებით მითითებული იყო „მიწა“ მესამე მოსმენის წინ კი უკვე მითითებული იყო „სასოფლო-სამეურნეო მიწა“

როგორც ენმ-ს წევრი დეპუტატი აღნიშნავს, თავდაპირველად მმართველმა გუნდმა ამ ნაბიჯით ე.წ „მარშისტების“ გულის მოგება სცადა, თუმცა შემდეგ მიხვდნენ რომ დიდ სისულელეს აკეთებდნენ. მიუცედავად იმისა, რომ კონსტიტუციაში ცვლილება იმ სახით არ შევიდა, როგორც „მარშისტებს“ სურდათ, გოცირიძე ამ ფაქტს კანონდარღვევად მიიჩნევს:

„კონსტიტუცია კანონდარღვევით იქნა მიღებული!

გუშინ, კონსტიტუციის მიღებისას, პარლამენტმა აშკარა უკანონობა ჩაიდინა. ნაცვლად რედაქციული ხასიათის ცვლილებისა, არსებითი ხასიათის ცვლილება შეიტანა კანონპროექტში. თანაც როგორი: თუ ორივე მოსმენით მიღებულ და გამოქვეყნებულ დოკუმენტში შეზღუდვებში ეწერა ”მიწა”, მესამე მოსმენისას წინ წაუმატეს სიტყვა ”სასოფლო-სამეურნეო”, ანუ შეზღუდვები ეხება არა ყველა კატეგორიის მიწას, არამედ მხოლოდ სასოფლო-სამეურნეო დანიშნულებისას.

ეს არის სერიოზული კანონდარღვევა, მიუხედავად იმისა, რომ გამოსწორდა თავდაპირველი აბსურდული ჩანაწერი.

როგორც ჩანს, თავიდან მარშისტების, პირადი მოძღვრებისა თუ კიდევ სხვების გულის მოგება უნდოდათ, მაგრამ მიხვდნენ, რომ დიდ სისულელეს სჩადიოდნენ.

კეთილი ინებონ და დატოვონ ისე, როგორც წესია და სასწრაფოდ დაიწყონ ამ შეცდომის გამოსწორების კანონით განსაზღვრული პროცედურები.

დრო დაიკარგება? ამათ ხელში დრო ისედაც დაკარგულია.

საჭიროა გამოძიების დაწყება აღნიშნულ ფაქტზე.“- წერს რომან გოცირიძე ფეისბუკზე.