"ეს არის კლანური კონსტიტუცია, ხელისუფლება უბიძგებს ხალხს გამოვიდეს ქუჩებში"- ნიკა მელია

პოლიტიკა - 14:33, 26 Sep, 2017

1478

ქუთაისის პარლამენტის შენობასთან, „დაიცავი კონსტიტუციას“ ფარგლებში გაერთიანებული პარტიები საპროტესტო აქციას მართავენ. ოპოზიციური პარტიები მმართველ გუნდს ერთპარტიული კონსტიტუციის მიღებაში ადანაშაულებენ. მათი განცხადებით ხელისუფლება ამგვარი ნაბიჯებით ხალხს ქუჩაში გამოსვლისკენ უბიძგებს. „ერთიანი ნაციონალური მოძრაობის“ პოლიტსაბჭოს თავმჯდომარის ნიკა მელიას თქმით „ქართული ოცნებამ“ განიზრახა კლანური კონსტიტუციის მიღება, რომელიც აბსოლუტურად შორსაა კონსენსუსისგან:

„დღეს არის ძალიან სამწუხარო დღე, დღე როდესაც „ქართულმა ოცნებამ“ განიზრახა ხორცი შეასხას არათუ ერთპარტიული, არამედ კლანური კონსტიტუციის მიღებას. კონსტიტუცია, რომელიც არ ეფუძნება თანხმობას, რომელიც აბსოლუტურად შორსაა კონსენსუსისგან. მთელი ოპოზიციური სპექტრის, არასამთავრობო ორგანიზაციების და საერთაშორისო ავტორიტრტული ორგანიზაციების საწინააღმდეგო მოსაზრების მიუხედავად „ქართული ოცნება“ მაინც აპირებს ამ განზრახვის შესრულებას. ის რომ ბატონი კობიაშვილი და ბატონი კალაძე, ბატონი ვოლსკი და ქანთარია, ქალბატონი ენძელა და ქალბატონი ბესელია შეთანხმდნენ და აქ არის თანხმობა, არ ნიშნავს იმას, რომ ვინაიდან მათ მანდატები ყოფნით , უნდა მიიღონ ეს დიქტატორული კონსტიტუცია, რომელიც ქართულ სახოგადოებას უკარგავს შანსსაც კი რომ გადაირჩიოს მთავრობა. ასეთი ქმედებები იწვევს იმას, რაც არაერთხელ მომხდარა, ხელისუფლება უბიძგებს ხალხს გამოვიდეს ქუჩებში. ეს თუ არ იქნება ხვალ, ეს იქნება ზეგ, წარმოუდგენელია სხვაგვარად განვითარდეს. ვგეგმავთ იმას რაც უნდა დაგეგმოს ნებისმიერმა თავმოყვარე საზოგადოებრივმა ჯგუფმა თუ პოლიტიკურმა ოპოზიციურმა ძალამ, არცერთი ჩვენგანი არ ვაპირებთ შევეგუოთ ამას, სხვა გამოსავალს არ ტოვებს ხელისუფლება. მათ იციან, რომ თუ მიიღებდნენ იმ კონსტიტუციას, რომელიც უნდა მიეღოთ, ისინი ავტომატურად კარგავდნენ ხელისუფლებას.“- განაცხადა ნიკა მელიამ.