მრეწველები, კონსერვატორები, სოციალ-დემოკრატები და მწვანეები ოპოზიციას და პრეზიდენტს აკრიტიკებენ

პოლიტიკა - 10:22, 26 Sep, 2017

994

საპარლამენტო უმრავლესობაში შემავალი 4 პარტია საკონსტიტუციო ცვლილებებთან დაკავშირებით განცხადებას ავრცელებს და ოპოზიციას სიცრუის გავრცელებაში ადანაშაულებს. მათი თქმით, ოპოზიციის მხრიდან წამოსული ბრალდება, რომ საკონსიტუციო ცვლილებების პროექტი მხოლოდ ქართული ოცნების მიერაა იღებული სიცრუეა და შეურაცხმყოფელია იმ პარტიებისთვის, რომლებიც საპარლამენტო უმრავლესობაში შედიან.

„საქართველოს პარლამენტის უმრავლესობაში, გარდა „ქართული ოცნებისა“, ფრაქციების სახით წარმოდგენილია ოთხი პოლიტიკური სუბიექტი, რომლებსაც ცნობადობაც, ისტორიაც, რეიტინგიც, რეპუტაციაც და პარტიის წევრთა რაოდენობაც კი გაცილებით დიდი აქვთ, ვიდრე პრეზიდენტის მიერ კონსტიტუციური პროცესის დასაზიანებლად შემოკრებილი პარტიების უდიდეს უმრავლესობას.

შესაბამისად, უპასუხისმგებლო და ტყუილია ნებისმიერი განცხადება იმის შესახებ, რომ თითქოს ახალი კონსტიტუცია მიიღება მხოლოდ ერთი პარტიის მხარდაჭერით.

ამიტომ, მოვუწოდებთ ჩვენს ოპონენტებს, თავი შეიკავონ ისეთი განცხადებებისგან, რომლებშიც აშკარად და მიზანმიმართულად შეურაცხყოფენ მინიმუმ ოთხ საპარლამენტო პარტიას.

აქვე, საპარლამენტო უმრავლესობაში ფრაქციების სახით წარმოდგენილი პარტიები, აბსოლუტურად თანაბრად ვიზიარებთ ახალ კონსტიტუციასთან დაკავშირებულ პასუხისმგებლობას და მოხარულები ვართ, რომ თითქმის ერთწლიანი ინტენსიური მუშაობის შედეგად, შევქმენით ისეთი კონსტიტუციური პროექტი, რომელიც უპრეცედენტო საყოველთაო-სახალხო განხილვებისას მხარდაჭერილია საზოგადოების მიერ, დადებითად აფასებს ვენეციის კომისია და უდავოა, რომ ამ კონსტიტუციური რეფორმით ჩვენი ქვეყნის გრძელვადიანი დემოკრატიულ განვითარება იქნება უზრუნველყოფილი.“- აღნიშნულია განცხადებაში, რომელსაც ხელს აწერენ სოციალ-დემოკრატები - საქართველოს განვითარებისთვის, საქართველოს კონსერვატიული პარტია, საქართველოს მწვანეთა პარტია, პოლიტიკური გაერთიანება - მრეწველობა გადაარჩენს საქართველოს