პარლამენტის თავმჯდომარე ირაკლი კობახიძე პირველი არხისთვის მიცემულ ინტერვიუში აცხადებს, რომ თუ ოპოზიცია კონსტრუქციულ მიდგომას გამოავლენდა, საკონსტიტუციო ცვლილებების ფართო კონსენსუსით მიღებას და ამასთანავე, „ქართული ოცნების“ ერთიანობის მყარად შენარჩუნება შესაძლებელი იქნებოდა:

„ეს იქნება - პრეზიდენტის არჩევის წესი, სტატუსი, უფლებამოსილებები, უშიშროების საბჭო, თავდაცვის საკითხები თუ მთავრობის უფლებები. არცერთ ამ საკითხთან მიმართებაში შენიშვნა არ არის გამოთქმული. რაც შეეხება საარჩევნო სისტემას, ვენეციის კომისია აცხადებს, რომ მაშინ, როცა პროპორციული სისტემა ხუთ პროცენტიანი ბარიერის პირობებში ამოქმედდება, ეს ევროპულ სტანდარტებთან სრულად თავსებადი იქნება. უფრო მეტიც, ეს არის საუკეთესო ევროპული პრაქტიკა, რადგან ევროკავშირის ქვეყნების ნახევარზე მეტში, სადაც პროპორციული სისტემა მოქმედებს, საკანონმდებლო ორგანოები სწორედ ხუთ პროცენტიანი ბარიერით აირჩევიან. მათ კრიტიკის საფუძველი არ დარჩათ და ბუნებრივია, უსაფუძვლო კრიტიკა იმ შესაძლებლობას მოკლებულია, რომ პროტესტის გამოსათქმელად ხალხის მობილიზება თუნდაც მინიმალური დოზით მოახერხო. ოპოზიციას აქციების გამართვის რესურსი დღეს არ აქვს და ამას სხვადასხვა მიზეზი აქვს. პირველი მიზეზია ის, რომ კონკრეტულ პარტიებს საკმარისი მხარდაჭერა არ აქვთ და მათი პოზიციები შინაარსობრივად უაღრესად სუსტია. მათ კრიტიკის საფუძველი არც საკონსტიტუციო ცვლილებებთან მიმართებაში აქვთ და ასეთ პირობებში ხალხის თუნდაც მინიმალური დოზით მობილიზება შეუძლებელი იქნება“, - ამბობს კობახიძე პირველ არხთან ინტერვიუში.