უმრავლესობა საკონსტიტუციო ცვლილებების მესამე მოსმენით დამტკიცებას გეგმავს, ოპოზიცია კი სამოქმედი გეგმაზე ამ წუთებში "ეროვნულ დემოკრატიული პარტიის" ოფისში მსჯელობს.

"ერთიანი ნაციონალური მოძრაობის" ერთ-ერთი ლიდერი ნიკა რურუა აცხადებს, რომ "უვარგისი კონსტიტუციის დამტკიცების წინააღმდეგობის გაწევა ყველას ვალია".

"ფაქტია, რომ ქართული ოცნება ვერ ხვდება, იმას რაც ბავშვისთვისაც ნათელია. ვენეციის კომისიამაც ამცნო ყველას, მათ შორის ხელისუფლებასაც, რომ დღევანდელი პროექტი არ ვარგა. ის გამორიცხავს დემოკრატიული გარანტიების არსებობას კონსტიტუციაში. რეალურად ქვეყანაში ძალაუფლების ბალანს არღვევს. ხალხს ართმევს უფლებას აირჩიოს პრეზიდენტი და არის ერთპარტიული, ანუ მიღებული საერთო თანხმობის, კონსენსუსის გარეშე. ეს არის უვარგისი კონსტიტუცია და მისთვის წინააღმდეგობის გაწევა ყველა ჩვენგანის ვალია. მარტო პოლიტიკოსების და პარტიების კიარა, ყველასი - კონსტიტუცია მთელი ქვეყნის დოკუმენტია"- განაცხადა ნიკა რურუამ.

მისი თქმით, ორი მოსმენით მიღებულ კანონპროექტს "ყველანაირი გზით უნდა დაუპირისპირდნენ".

"მაქსიმალური რაოდენობის ადამიანებთან უნდა ვაწარმოოთ დიალოგი, პირველ რიგში საზოგადოებასთან, რომ ამ უვარგის, არალეგიტიმურ დოკუმენტს დღეგრძელობა არ ჰქონდეს. ეს არის დოკუმენტი, რომელიც გარანტირებას ახდენს ქვეყანაში ოლიგარქიის დაფძნების, არა კანონის უზენაესობის, არამედ კანონით უზენაესობის"- თქვა უმცირესობის ერთ-ერთმა ლიდერმა.

მისი თქმით, "თვითონ მოქმედება დაგვანახებს რას აკეთებს ოპოზიცია და საზოგადოება". ოპოზიციის წარმომადგენლები საპროტესტო აქციების გამართვას არ გამორიცხავს.

"კონკრეტულ გეგმებზე ახლა არ ვისაუბრებთ. არაფერს გამოვრიცხავ. პირიქით, გამოვრიცხავ უმოქმედობას, არ შეიძლება შევეგუოთ იმას, რომ ხალხს არ შეეძლოს არჩევნებით ხელისუფლების ცვლა. დღეს რაც ხდება, ეს არის მხოლოდ იქითკენ მიმართული, რომ ქართულმა ოცნებამ თბილად უზრუნველყოს ხელისუფლებაში დარჩენა, რაც შეიძლება დიდი ხნით რასაც არ უნდა ფიქრობდეს ხალხი. ხალხს ისინი უყურებენ, როგორც ცხვრებს. ეს კონსტიტუცია ამის ნიშანია, ამის დაშვება არ შეიძლება. პირიქით, საპროტესტო აქციებს კი არ გამოვრიცხავ, აუცილებელია წინააღმდეგობის გაწევა და ამ ინიციატივის დამარცხება"- აღნიშნა ენმ-ს წევრმა.