სპეცსამსახურების საიდუმლო აგენტს, ალეკო სამუშიას, "შაბათის კურიერში" გასული სკანდალური ინტერვიუს შემდეგ, გვიან ღამით, ციხე შეუცვალეს. ინფორმაციას ამის შესახებ „სამართალდამცავთა რეფორმირების ცენტრის“ ხელმძღვანელი, ზვიად კუპრავა ავრცელებს.

სასჯელაღსრულებისა და პრობაციის სამინისტრო აცხადებს, რომ "რუსთავიუ 2"-ში გასული ინტერვიუს შემდეგ მოხდა მსჯავრდებულთან გასაუბრება, რა დროსაც სამუშიას, უსაფრთოების დაცვის მიზნით, შესთავაზეს დახურული ტიპის დაწესებულებაშ გადაყვანა, რაზედაც მან თანხმობა განაცხადა.

განსხვავებულ ინფორმაციას ავრცელებს ზვიად კუპრავა, რომელიც აცხადებს, რომ მისი მტკიცებით, სამუშია გლდანის, თანამშრომლებისთვის განკუთვნილი სპეციალური კორპუსიდან, რუსთავის ციხეში სამარტოო საკანში გადაიყვანეს.

„დამიკავშირდა ალექსანდრე სამუშიას თანამესაკნე, რომელმაც მითხრა, რომ გუშინ გვიან ღამით მასთან შემოვიდა ბადრაგი და ბადრაგმა ის გადაიყვანა რუსთავის მე-6 დაწესებულებაში, რომელიც არის რთული ტიპის დაწესებულება, მძიმე დაწესებულება, სადაც სასჯელს იხდიან განსაკუთრებულად მძიმე დანაშაულში ბრალდებული დამნაშავეები. არის სამარტოო საკნები და ის იქ იმყოფება და მას მოუწევს იქ მოუწევს ძალიან რთულ ვითარებაში ყოფნა, მთელი ამ დარჩენილი წლების ძალიან რთულ მდგომარეობაში გატარება. ეს მისთვის არის ტანჯვის ტოლფასი და მთხოვეს მათ, რომ იქნებ დავხმარებოდი ალეკო სამუშიას. მას შემდეგ, რაც სიუჟეტი გავიდა "შაბათის კურიერში“ წუხელ, გვიან ღამით, სიუჟეტის შემდეგ შემოვიდნენ ბადრაგების თანამშრომლები, რომლებმაც მოახდინეს მისი გადაყვანა,“ - განაცხადა ზვიად კუპრავამ.