საკონსტიტუციო რეფორმა და ვენეციის კომისიის დასკვნა - აღნიშნულ საკითხზე ორი დღეა პოლიტიკურ სპექტრში მწვავე განცხადებები კეთდება. ვენეციის კომისსიამ გუშინ გამოაქვეყნა დასკვნა, რომელსაც მმართველი გუნდი დადებითს უწოდებს, ოპოზიცია კი უმრავლესობას საზოგადოების შეცდომაში შეყვანაში ადანაშაულებს.

„თავისუფალი დემოკრატების“ ერთ-ერთი ლიდერი ნინო გოგუაძე აცხადებს, რომ ვენეციის კომისამ გაიზიარა სამოქალაქო სექტორისა და ოპოზიციური პარტიების პოზიციები:

„ვენეციის კომისიამ აბსოლუტურად გაიზიარა სამოქალაქო სექტორის და ოპოზიციური პარტიების პოზიცია, თქვა, ის საკითხი რომ პროპორციულ სისტემაზე არ გადავდივართ 2020 წლიდან, არის ზიანის მიყენება ქვეყანაში სამოქალაქო თანხმობისთვის და ქყვეყნის სამართლებრივი განვითარებისთვის“, - აღნიშნავს ნინო გოგუაძე.

„ლეიბორისტული პარტიის“ თბილისის მერობის კანდიდატი გიორგი გუგავა აღნიშნავს, რომ მმართველი გუნდი საკონსტიტუციო რეფორმის მიმართ არსებული ნეგატიური დამოკიდებულების დადებითაც წარმოჩენას ცდილობს:

„მმართველ პარტიას, მის წარმომადგენლებს ან ტექსტის წაკითხვის და აღქმის პრობლემა აქვთ ან უტიფრობის სენი შეეყარათ. ვფიქრობ, უტიფრობის სენი აქვთ შეყრილი, როდესაც ცდილობენ, წარმოაჩინონ პოლიტიკური პარტიების, არასამთავრობო ორგანიზაციების, მთლიანად საზოგადოების და რაც მთავარია, საერთაშორისო საზოგადოების ნეგატიური დამოკიდებულება საკონსტიტუციო გადატრიალების მიმართ დადებითად,“ - განაცხადა გიორგი გუგავამ.

პოლიტიკური ერთობა „ახალი საქართველოს“ თბილისის მერობის კანდიდატი აღნიშნავს, რომ დასკვნაში ვენეციის კომისამ ხაზი გაუსვა ყველა იმ პრობლემას, რაც საკონსტიტუციო რეფორმასთან დაკავშირებით არსებობს:

„ცრუ ჟივილ-ხივილი, რომელიც ქართულმა ოცნებამ განახორციელა, ეს იყო ჩვეუებრივად საზოგადოების შეცდომაში შეყვანის მცდელობა, ძალიან მარტივად, გასაგები ენით ვენეციის კომისიამ ცალსახად ხაზი გაუსვა ყველა იმ პრობლემურ და ნეგატიურ საკითხს, რომელიც საქართველოში საკონსტიტუციო ცვლილებებთან დაკავშირებით მიმდინარეობდა“, - განაცხადა გიორგი ვაშაძემ.